Hefur unun af því að mála dýr

Á kjötsúpuhátíð Rangárþings eystra síðustu helgina í ágúst var upplýst að Gunnhildur Þórunn Jónsdóttir frá Berjanesi hefði verið valin sveitarlistamaður sveitarfélagsins næsta árið en hún býr á Hvolsvelli í dag með fjölskyldu sinni.

Markaðs- og menningarnefnd sveitarfélagsins óskaði eftirtilnefningumtil sveitarlistamanns og bárust margar tilnefningar frá íbúum. Í umsögn nefndarinnar segir meðal annars: „Listamaðurinn sem varð fyrir valinu er flestum kunnur, enda heimamaður í húð og hár. Um er að ræða listmálara sem hefur getið sér gott orðspor innan okkar svæðis og á landinu öllu sem og erlendis. Listaverk hans prýða án efa veggi og hillur margra landsmanna, sérstaklega hestamanna, en listamaðurinn hefur verið fenginn oftar en einu sinni til að mála verðlaunaplatta fyrir hestamannamót, en einnig fyrir sýningar t.d. á degi sauðkindarinnar. Við getum verið stolt af honum, sem fulltrúa okkar sveitarfélags.“

Gunnhildur vill helst mála kindur og augu hrossa, en málar mikið eftir pöntun og þá aðallega hross, en landslagsmyndir hennar eru ekki síðri. Gunnhildur hefur tekið þátt í sýningum og jafnframt verið með einkasýningar, og hefur hún einnig verið með bás á Landsmóti hestamanna. Hún málar málverk, útbýr tækifæriskort og skreytir verðlaunagripi eftir pöntun.

Góð tilfinning

„Tilfinningin er bara góð. Verðlaunin komu mér á óvart, satt best að segja, mér fannst ég ekkert vera búin að afreka neitt sérstakt í ár. Ég ætlaði ekki einu sinni á Kjötsúpuhátíðina. Ég var að klára vsk-útreikninga og þurfti að fara út í sveit að athuga með lamb sem hafði verið í afveltu daginn áður og smala smá. Maðurinn minn átti í mesta basli með að fá mig með sér og ég skildi ekkert í honum að fara bara ekki án mín en hann vissi af því að ég ætti að fá þessa viðurkenningu,“ segir Gunnhildur skellihlæjandi aðspurð um tilfinninguna að vera orðin sveitarlistamaður Rangárþings eystra.

Gunnhildur segist alltaf hafa haft mikla þörf fyrir að mála og teikna, alveg frá því að hún man eftir sér. „Mamma passaði að henda ekki myndum, sem ég teiknaði þegar ég var lítil, sem er gaman að skoða í dag og sjá hvað ég var í raun snemma komin með góða færni. Það má segja að ég hafi bara þróast sjálf án mikillar utanaðkomandi kennslu. Þó man ég eftir kennurum, bæði í barnaog unglingaskóla, sem höfðu áhrif. Svo hef ég tekið örfá námskeið, en mest hef ég lært af að æfa mig og æfa, þannig kemur þetta, með dassi af sjálfsgagnrýni í farteskinu,“ segir Gunnhildur.

Flestir velja dýr

Gunnhildur þykir einstaklega snjöll við að mála dýr, enda eru það vinsælustu myndirnar hennar. „Já, það hefur eiginlega þróast þannig, ég er beðin um að mála að mestu dýr þó landslag komi líka fyrir, en já, ég hef mjög gaman af því að mála dýr, sérstaklega kindur og hesta. Það er reyndar gaman að mála hvaða dýr sem er ef fyrirmyndin er góð,“ segir hún. Þessa dagana er hún að klára að mála stórt málverk af Snæfelli, málverk af kúm og svo tveimur hundum, sem allt eru sérpantanir. Ef lesendur vilja fylgjast með Gunnhildi á samfélagsmiðlum þá er hún á Facebook undir „Gunnhildur Myndlist/ART“ og á Instagram „gunnhildur_myndlist_art“.