Havarí hlaðvarp – samtal um lífræna ræktun og framleiðslu í Hlöðunni
Berglind Häsler, eigandi Havarí í Berufirði og markaðsstjóri í Reykjavík, stýrir hlaðvarpinu Havarí – samtal um lífræna ræktun og framleiðslu í Hlöðunni, hlaðvarpi Bændablaðsins.
Í fyrsta þætti sínum spjallar Berglind við Eygló Björk Ólafsdóttur, bónda í Vallarnesi á Fljótdalshéraði og annar eigandi framleiðslufyrirtækisins Móðir Jörð. Hún er einnig formaður VOR - verndun og ræktun, sem er hagsmunafélag framleiðenda sem stunda lífræna ræktun eða fullvinnslu lífrænna, íslenskra afurða.
Eygló segir lífræna ræktun gefa af sér gæðaafurðir en ennfremur séu aðferðirnar vænlegri til framtíðar. „Í lífrænni ræktun ertu með betri vöru. Það er meira magn af þurrefnum, plönturnar taka meira næringarefni upp úr jarðveginum, meira af steinefnum og vítamínum. Þannig þú ert betri mat,“ segir Eygló meðal annars.
Risastórt umhverfis- og lýðheilsumál
„Það er staðreynd að á undanförnum áratugum hefur næringargildi matvæla almennt verið að minnka. Það er meðal annars vegna þessarar einföldunar sem búið er að koma á með tilbúnum áburði sem inniheldur einungis brot af þeim grunnefnum, sem jarðvegurinn og plönturnar þarfnast. Þetta er miklu flóknara en svo að þú getir staðlað það sem þær þurfa,“ segir Eygló og nefnir að rannsóknir bendi til þess að í loftlagslegu tilliti sé lífræn ræktun betri ræktunaraðferðir.
„Binding kolefnis er meiri. Jarðvegurinn verður ríkari af örverum og þetta er líklegra til að binda kolefni í vaxandi mæli í framtíðinni. Meðan tilbúinn áburður virðist brjóta niður getu jarðvegs til að binda kolefni. Þetta eru tvö kerfi sem ganga í sitthvora áttina þegar við erum að tala um loftlagsmál.“
Hlaðvarpið Havarí er samvinnuverkefni VOR og Bændablaðsins og er nú aðgengilegur á öllum helstu streymisveitum en einnig má hlusta á hann hér að neðan.
