Hátt í hundrað þúsund rúmmetrum timburs hent
Íslenska nýsköpunarfyrirtækið Timber recycling ehf. mun endurvinna timburúrgang og breyta honum í timbureiningar fyrir byggingariðnað.
Timber recycling ehf., fyrirtæki í eigu Högna Stefáns Þorgeirssonar, á að endurvinna timburúrgang og umbreyta í hágæða timbureiningar fyrir byggingariðnaðinn. Með því að nýta timbureiningar unnar úr úrgangstimbri í stað nýrra viðarefna, hyggst Högni stuðla að minni sóun, lægra kolefnisspori og sjálfbærari byggingarlausnum.
Gríðarmiklu hent
„Þetta snýst um að taka timbur sem náð hefur endastöð í núverandi kerfi og veita því framhaldslíf. Það gæti verið í formi ýmissa gæðagripa, t.d. stóla, borða, gólfefnis, veggfjala o.fl.,“ segir Högni. Hann er forstjóri og eigandi Timber recycling og segist hafa fengið góða ráðgjöf frá mörgum til þess bærum aðilum. Verkefnið sé í raun og veru mikilvægt á heimsvísu.
„Á Íslandi er hent 90-95 þúsund rúmmetrum af timbri á hverju ári, en það er eins og að þéttraða timbrinu á fótboltavöll og nær það fjall 16 metra upp í loft, eða svona eins og sjö hæða blokk,“ útskýrir Högni. Hann telur skipta miklu máli að unnið sé úr þessu affallstimbri og þannig stuðlað að sjálfbærari framtíð á grunni hins gamla efniviðar.
Um þessar mundir er Högni að kanna úrvinnslumöguleika. „Við erum að líma saman bita og gera klára fyrir álagsprófanir,“ segir hann.
Góður meðbyr
Högni var með verkefnið í viðskiptahraðlinum Hringiðu í fyrra, en það er prógramm til að aðstoða íslensk nýsköpunarfyrirtæki sem vinna að grænum lausnum við að koma hugmyndum sínum hratt og vel áfram.
Hann segist ekki hafa mætt neinum sérstökum fyrirstöðum í verkefninu, móttökur séu almennt góðar.
„Ég bara sé ekki erfiðleika í því sem ég er að gera. Aðeins mismunandi flækjustig í verkefnum,“ segir hann. „Fyrst hélt ég að það yrði erfitt að sannfæra fólk um ágæti verkefnisins, en svo reyndist alls ekki vera. Það virðast allir skilja ágæti og mikilvægi þess.“
Meginmarkmið fyrirtækisins verður að framleiða vörur fyrir byggingariðnaðinn og þegar fram líða stundir að vinna úr æ meira hráefni og auka vöruúrval.
