Hart verður barist um Landsmótsrétt
Hrossaræktarárið 2016 hófst með kynbótasýningu að Sörlastöðum í Hafnafirði daganna 17.–20. maí. Komu þar fram glæsileg hross sem gáfu góð fyrirheit um framfarir og góða stöðu hrossaræktar í landinu.
Átta kynbótasýningar munu fara fram fyrir Landsmót hestamanna en í ár verður í fyrsta sinn fjöldatakmarkanir kynbótahrossa á hátíðina.
Alls var 101 hross skráð til dóms á Sörlastöðum en 72 hlutu fullnaðardóm. Hæstu aðaleinkunn hlaut stóðhesturinn Hafsteinn frá Vakursstöðum, undan Álfasteini frá Selfossi og Hendingu frá Hvolsvelli. Hafsteinn hlaut jafnan dóm, 8,70 í aðaleinkunn, 8,63 fyrir sköpulag og 8,75 fyrir kosti. Þar af hlaut hann einkunnina 9 fyrir tölt, skeið, vilja og geðslag, höfuð, samræmi og fótagerð. Hafsteinn, sem er á áttunda vetri, var sýndur af Teiti Árnasyni.
Fimm vetra leirljós stóðhestur, Draupnir frá Stuðlum, vakti athygli þegar hann hlaut næsthæstu aðaleinkunn sýningarinnar, 8,68. Draupnir, sem er undan Kiljan frá Steinnesi og heiðursverðlaunahryssunni Þernu frá Arnarhóli, hlaut 8,55 fyrir sköpulag og 8,77 fyrir kosti. Þar af hlaut hann einkunnina 9 fyrir tölt, skeið, vilja og geðslag og fegurð í reið. Sýnandi Draupnis var Daníel Jónsson.
Sömu aðaleinkunn, 8,68, hlaut Organisti frá Horni I, sýndur af Árna Birni Pálssyni. Organisti, sem er undan Ágústínusi frá Melaleiti og Flautu frá Horni I, hlaut 8,39 fyrir sköpulag og glæsilega 8,87 fyrir kosti, þar sem einkunnin 9 var gefinn fyrir flestalla þætti hæfileikadóms.
Hæstu einkunn fyrir kosti hlaut Álfarinn frá Syðri-Gegnishólum, 8,92. Þar af hlaut Álfarinn einkunnina 9,5 fyrir vilja og geðslag og 9 fyrir tölt, brokk, skeið og fet en sýnandi hans var Bergur Jónsson. Álfarinn er undan Keili frá Miðsitju og heiðursverðlaunahryssunni Álfadísi frá Selfossi, en bróðir hans sammæðra, Álfgrímur frá Syðri-Gegnishólum, undan Orra frá Þúfu var einnig sýndur á Sörlastöðum og hlaut hann 8,33 í aðaleinkunn. Sýnandi Álfgríms var Olil Amble.
Hæstu einkunn fyrir sköpulag, 8,72, hlaut Hrókur frá Efsta-Dal II. Hann hlaut 8,40 í aðaleinkunn, 8,19 fyrir kosti. Sýnandi Hróks var Guðmundur Friðrik Björgvinsson.
Uppfærð sýningarskrá aðgengileg
Kynbótasýningar á Landsmótsári vekja ávallt eftirvæntingu meðal hestamanna enda koma þá alla jafna fram frambærilegustu ræktunarhross landsins. Alls munu 165 kynbótahross koma fram á Landsmóti hestamanna sem haldið verður á Hólum í Hjaltadal dagana 27. júní til 3. júlí næstkomandi. Verður það í fyrsta sinn sem fjöldatakmörkun verður sett á þátttökurétt kynbótahrossa á hátíðinni, en horfið hefur verið frá einkunnarlágmörkunum. Þess í stað munu hæst dæmdu hross vorsýninga, skilgreindur fjöldi í hverjum aldursflokki, hljóta þátttökurétt. Miðað við gæði og framgöngu hrossa á fyrstu kynbótasýningu ársins má búast við að hart verði barist um sæti á Landsmóti.
Á heimasíðu WorldFengs má nálgast lista yfir þau hross sem eiga þátttökurétt á Landsmóti, en listinn er í sífelldri uppfærslu meðan á vorsýningum stendur. Ekki þarf að skrá sig inn í WorldFeng til að sjá listann heldur má opna hann með því að smella á „Sýningarskrá fyrir Landsmót 2016“ á heimasíðu upprunaættbókarinnar.
Í vikunni fara fram sýningar um allt land. Á Brávöllum á Selfossi eru 132 hross skráð til dóms, 55 hross koma fram á Akureyri og 18 á Fljótsdalshéraði. Í byrjun júní fara svo fram þrjár stórar sýningar, í Borgarfirði, Kópavogi og við Hellu, sem munu að lokum leiða í ljós hvaða ræktunargripir munu láta ljós sitt skína í Skagafirði í sumar.
