Gin- og klaufaveiki eftir hálfrar aldar hlé
Eftir 50 ára hlé berjast Ungverjar nú aftur við gin- og klaufaveiki. Hún greindist 7. mars á stóru nautgripabúi nálægt landamærum Slóvakíu.
lóvakíu. Strangar ráðstafanir hafa verið gerðar af hálfu ungverskra dýraheilbrigðisyfirvalda og Evrópusambandsins til að hindra útbreiðslu gin- og klaufaveiki sem greindist í hjörð mjólkurkúa á Györsvæðinu í vesturhluta Ungverjalands.
Fimmtíu ár eru síðan veiran greindist síðast í landinu. Kjötútflutningsmarkaður Ungverjalands er í lamasessi, útflutningur kjöts af búpeningi óheimill og takmarkanir á flutningi dýra innanlands. Hefur víðast verið lokað fyrir innflutning ungversks kjöts af nautgripum, svínum, kindum og hjartardýrum, þ.e. hráu kjöti og mjólkurafurðum, m.a. í Bretlandi.
Varúðarástand er einnig í Slóvakíu þar sem Györ-Moson-Sopronsýsla liggur að landamærunum. Dýragörðum hefur verið lokað. Viðbrögð við uppkomu pestarinnar í Evrópusambandsríkjum og öðrum löndum þar sem hún er ekki landlæg, eru fyrst og fremst að aflífa öll móttækileg dýr í þeirri hjörð sem sýkingin greinist í og jafnvel nágrannabúum í varúðarskyni.
Skv. Matvælastofnun hefur gin- og klaufaveiki ekki greinst í neinu öðru ríki Evrópusambandsins. Hún er aftur á móti landlæg í mörgum löndum heims og smit getur borist með ýmsum hætti milli landa. Ein algengasta smitleiðin er ólöglega innflutt matvæli. Gin- og klaufaveiki greindist í Þýskalandi í upphafi þessa árs og hafði þá ekki greinst í Evrópusambandsríki síðan 2011. Aðgerðir í Þýskalandi tókust vel og veiran var fljótt upprætt. Engin þekkt tenging er milli smitsins í Þýskalandi og þess sem nú kom upp í Ungverjalandi.
Gin- og klaufaveikiveiran sýkir ekki fólk og því stafar ekki hætta af umgengni við sýkt dýr né neyslu afurða.
