Formannskosning í uppsiglingu hjá BÍ

Gunnar Þorgeirsson, bóndi í Ártanga og formaður Sambands garðyrkjubænda, greindi frá því í dag á búnaðarþingi að hann hygðist bjóða sig fram til formennsku gegn sitjandi formanni, Guðrúnu S. Tryggvadóttur. Kosningarnar verða á morgun þriðjudag eftir klukkan 13.00.

Samhliða framboði Gunnars hafa fjórir aðrir gefið kost á sér til stjórnarsetu, þau Oddný Steina Valsdóttir, sauðfjár- og nautgripabóndi í Butru í Fljótshlíð, Ingi Björn Árnason, kúabóndi í Marbæli í Skagafirði, Guðmundur Svavarsson, framkvæmdastjóri Reykjagarðs og Halla Eiríksdóttir, sauðfjárbóndi á Hákonarstöðum á Jökuldal. Athygli vekur að tveir af þessum frambjóðendum eru ekki búnaðarþingsfulltrúar, þeir Ingi Björn og Guðmundur. Öllum félögum í BÍ er hins vegar frjálst að bjóða sig fram til stjórnar.

Þrír núverandi stjórnarmenn, þau Guðrún Lárusdóttir, Einar Ófeigur Björnsson og Eiríkur Blöndal hyggjast ekki gefa kost á sér til núverandi stjórnarsetu. Það gera hins vegar Gunnar Kr. Eiríksson og Guðrún S. Tryggvadóttir núverandi formaður.