Fólk með fuglaflensu
Skæð fuglaflensa hefur orðið milljörðum fugla að aldurtila á árinu 2023. Samkvæmt Sóttvarnastofnun Bandaríkjanna (CDC) olli fuglaflensa einnig veikindum 19 manna í átta löndum árin 2022 og 2023.
Í níu tilfella var um alvarleg veikindi að ræða og leiddi fuglaflensa fimm til dauða. Einkenni þriggja einstaklinga voru væg og sjö voru einkennalaus. Samkvæmt skýrslu CDC höfðu einstaklingarnir í flestöllum tilfellum verið í návígi við sjúka eða dauða fugla.
Sundurliðun tilfella
Í skýrslunni má finna sundurliðun tilfellanna. Sex manneskjur greindust í Kambódíu, tvö í febrúar, tvö í október og tvö í nóvember árið 2023. Fjögur þeirra létust. Í Bretlandi komu upp fimm tilfelli, öll einkennalaus. Í Kína hafa tveir einstaklingar greinst, í september 2022 og janúar 2023.
Annar þeirra lést en ekki er vitað um afdrif hins. Tvö tilfelli hafa komið upp á Spáni, hjá starfsmönnum alifuglabús en báðir voru þeir einkennalausir. Í einu tilfelli í Víetnam lifði einstak- lingurinn alvarleg veikindi af. Eins veiktist einn alvarlega í Chile í mars árið 2023 en lifði af. Eitt tilfelli af alvarlegum einkennum sjúkdómsins greindist í Ekvador í desember 2022. Eitt einkenni hefur þá komið upp í Bandaríkjunum.
Í skýrslunni kemur einnig fram að frá því að CDC hóf skráningu á tilfellum skæðrar fuglaflensu árið 1997 hafa 902 tilfelli verið tilkynnt um smit í mönnum. Tilfellin ná til 22 landa og er dánarhlutfall tilfella meira en fimmtíu prósent.
Fylgst með fuglaflensu á Íslandi
Skæð fuglaflensa hefur verið greind og náð útbreiðslu bæði í framleiðsluhúsum alifugla, á fjölskyldubúgörðum, í bakgörðum sem og meðal villtra fugla. Skýrsla CDC segir að að minnsta kosti 77,8 milljón fugla hafi smitast í Bandaríkjunum og fari fjölgandi.
Fuglaflensan hefur einnig greinst í allmörgum spendýrum og nýjasta dæmi þess er ísbjörn í Alaska sem nýlega drapst úr þessum skæða smitsjúkdómi.
Á Íslandi hefur skæð fuglaflensa hefur greinst í villtum fuglum um allt land. Frá því í mars 2022 hafa verið í gildi hertar varnaraðgerðir til að fyrirbyggja að fuglaflensa berist í alifugla og fylgist Matvælastofnun með tilfellum hér á landi, m.a. með því að bregðast við ábendingum um dauða fugla sem finnast á víðavangi.
