Fjölmenningarhátíð í Rangárvallasýslu
Fjölmenningarráð Rangárþings eystra í samstarfi við nýstofnað fjölmenningarráð Rangárþings ytra hefur skipulagt fjölmenningarhátíð í íþróttahúsinu á Hvolsvelli laugardaginn 10. maí næstkomandi.
„Markmið hátíðarinnar er að fagna þeim mikla fjölbreytileika menningar og þjóða sem býr í Rangárþingi eystra og Rangárþingi ytra, stuðla að samtali og samþættingu ólíkra menningarhópa og kynna þá fjölbreyttu menningu og þjóðarbrot sem sveitarfélögin státa af en á svæðinu búa einstaklingar frá um 40 mismunandi löndum. Þá verður sérstaklega lögð áhersla á að koma á samtali milli íþróttafélaga og heimila erlendra barna í tengslum við íþróttaiðkun, en kannanir hafa sýnt að þátttaka þeirra er oft minni en hjá innfæddum börnum,“ segir Helga Guðrún Lárusdóttir, starfsmaður fjölmenningarráðs Rangárþings eystra
Á hátíðinni gefst innflytjendum og fólki af erlendu bergi brotið tækifæri til að kynna heimalönd sín og menningu í gegnum mat, muni, sögu, tónlist og fleira. Gestir munu geta kynnt sér ólík lönd og menningu þar sem í kynningarbásum verður boðið upp á samtal um sögu, siði og hefðir, listir og handverk frá ýmsum heimshornum. Hver bás mun hafa sinn eigin „menningarfulltrúa“ sem deilir upplýsingum og sögum. Þá verður boðið upp á fjölbreytt úrval af mat og drykkjum frá ýmsum heimshornum, útbúnum af innflytjendunum sjálfum. Auk þess verður hægt að upplifa tónlist og dans frá mismunandi menningarsvæðum, bæði á sviði og í óformlegri sýningu, jafnvel með kennslu þar sem gestir geta tekið þátt.
„Við erum ótrúlega spennt að bjóða til þessarar fyrstu sameiginlegu fjölmenningarhátíðar sveitarfélaganna. Í Rangárþingi eystra er um þriðjungur íbúa af erlendum uppruna og í Rangárþingi ytra er hlutfallið einnig töluvert. Það er afar mikilvægt að skapa vettvang þar sem allir okkar íbúar geta komið saman, kynnst hver öðrum enn frekar og fagnað þeirri fjölbreytni sem auðgar samfélag okkar svo mikið. Ég hvet alla til að koma og upplifa þennan litríka dag með okkur á Hvolsvelli,“ segir Georgina Anne Christie, formaður fjölmenningarráðs Rangárþings eystra.
