Fjöldi stangveiddra laxa jókst nokkuð milli ára
Heildarfjöldi stangveiddra laxa árið 2024 var, skv. bráðabirgðatölum Hafrannsóknastofnunar, um 42.400 fiskar.
Þrjátíu prósenta aukning varð á fjölda stangveiddra laxa í ár, í samanburði við árið í fyrra og veiðitölur þessa árs, um 42.400 fiskar, um tvö prósent undir meðalveiði áranna 1974 til 2023.
Veiðin 2024 var skv. bráðabirgðatölum Hafró um 9.700 löxum meiri en hún var 2023. Aukning var í veiði í ám í öllum landshlutum.
Í tölum um heildarlaxveiði eru taldir villtir laxar, laxar sem upprunnir eru úr sleppingum gönguseiða og einnig þeir laxar sem er sleppt aftur í stangaveiði (veitt og sleppt). Laxveiði í ám sem byggja veiði á sleppingum gönguseiða var alls um 7.300 laxar sem er um 300 löxum minna en veiddist 2023 þegar 7.061 lax veiddist. Frá þessu greinir á vef Hafró.
Aukning á heildarstangveiði villtra laxa
Við samanburð á langtímaþróun á stangaveiði þarf að taka tillit til þess að laxar úr gönguseiðasleppingum eru viðbót við náttúrulega framleiðslu ánna og einnig þegar veitt er og sleppt í stangaveiði veiðast sumir fiskar oftar en einu sinni. Þegar litið er til veiða á villtum laxi í stangaveiði eingöngu (ekki úr seiðasleppingum til hafbeitar), og áætlaður fjöldi endurveiddra laxa (veitt og sleppt) dreginn frá, er heildarstangveiði villtra laxa árið 2024 um 35.000 laxar, sem er um 36 prósent aukning frá 2023. Þrátt fyrir aukningu á milli ára þá er veiðin á árinu 2024 undir meðalveiði og hefur verið það síðustu 9 árin.
Laxadauði í sjó farið vaxandi
Fjöldi þeirra laxa sem ganga í ár er annars vegar háður fjölda seiða sem ganga úr ánum til sjávar og hins vegar hversu margir lifa sjávardvölina af og skila sér til baka í árnar. Almennt hefur dánartala laxa í sjó í Norður-Atlantshafi farið vaxandi, ástæður þess eru ekki þekktar en bent hefur verið á þætti eins og loftslagsbreytingar, meðaflaveiði, áhrif fiskeldis og breytingar á búsvæðum í fersku vatni.
Sumarið 2024 einkenndist af miklu vatnsrennsli í flestum ám og því mikil breyting frá árinu 2023 þegar lágrennsli var einkennandi.
