Dagur, Björn og Lenka best á Skákþingi Garðabæjar
Skákþingi Garðabæjar lauk á dögunum en mótshaldarinn, Taflfélag Garðabæjar, á um þessar mundir 45 ára afmæli.
Tefld var atskák á tveimur kvöldum. Jafntefli greinarhöfundar gegn Degi Ragnarssyni stöðvaði hann ekki, hann tefldi af festu og fékk átta vinninga af níu, leyfði aðeins tvö jafntefli. Þrír skákmenn fengu 6½ vinning, Arnar Milutin Heiðarsson, Jóhann Ingvason og Björn Þorfinnsson. Dagur var því í ákveðnum sérflokki í þessu móti, dagsformið hefur verið gott. Björn varð skákmeistari Garðabæjar enda efstur keppenda búsettur í Garðabæ. Lenka Ptácníková varð skákmeistari Taflfélags Garðabæjar með 5½ vinning.
Á dögunum lauk einnig mikilli mótasyrpu íslenskra skákmanna á Evrópumót ýmis á vegum Evrópska Skáksambandsins. Syrpunni lauk með Evrópumóti ungmenna í Budva í Svartfjallalandi. Budva er ekki svo langt frá hólmanum Sveti Stefan þar sem Bobby Fischer og Boris Spassky háðu endurkomueinvígi árið 1992. Þetta voru því sögulegar slóðir.
Árangur íslensku ungmennanna var undir pari á eló-kvarðanum fræga en það háir kannski okkur Íslendingum að láta reikna til stiga öll möguleg og ómöguleg mót, sem er ekki endilega venjan annars staðar. Sumir andstæðinga okkar eru því talsvert stigalægri en þeir væru ef þeir tækju þátt í íslensku mótahaldi. Bestum árangri náði Jósef Omarsson með fimm vinninga úr skákunum 9 og stigagróða upp á 32 stig. Jósef tefldi í flokki 14 ára og yngri. Ísland átti fulltrúa í öllum opnum flokkum frá 8 ára og yngri og upp í 18 ára og yngri, einn fulltrúa í stúlknaflokki 16 ára og yngri, og einn fulltrúa í stúlknaflokki 18 ára og yngri. Stúlkurnar tvær, Iðunn Helgadóttir og Guðrún Fanney Briem, urðu á árinu Norðurlandsmeistarar stúlkna í sínum aldursflokkum og skarta forsíðu tímaritsins Skákar.
Ekki má gleyma að segja frá nóvembermóti LeKock mótaraðarinnar sem Helgi Áss Grétarsson vann. 58 manns tóku þátt í þessu sterka móti, sem troðfyllti aðalsal veitingastaðarins við Tryggvagötu. Þátttaka Simons Williams frá Englandi vakti athygli en hann er nokkuð þekktur stórmeistari og vinsæll fyrir að útbúa skákmyndbönd á netinu. Á Youtube gengur hann undir nafninu GingerGM.
Í næsta pistli verður gerð grein fyrir Íslandsmóti skákfélaga þar sem um 400 skákmenn tóku þátt í Rimaskóla.
Ef lesendur Bændablaðsins luma á áhugaverðum skákum geta þeir haft samband.
