Breytingar á reglugerð um velferð sauðfjár og geitfjár
Atvinnuvegaráðuneytið hefur lagt drög að reglugerð um velferð sauðfjár og geitfjár í samráðsgátt stjórnvalda. Um endurskoðun á gildandi reglugerð er að ræða sem miðar að því að skýra gildandi ákvæði, samræma reglur og taka betur mið af ólíkum þörfum dýrategundanna.
Breytingatillögurnar byggja á reynslu og athugasemdum sem komið hafa fram við framkvæmd reglugerðarinnar sem tók gildi árið 2014.
Aukin þekking á velferðarþáttum
Sigurbjörg Bergsdóttir, sérgreinadýralæknir hjá Matvælastofnun, segir að reglugerðin hafi staðið nánast óbreytt frá gildistöku. „Við eftirlit stofnunarinnar höfum við rekið okkur á ýmis atriði sem við töldum að betur mætti fara og var því stungið upp á að fara í vinnu við endurskoðun reglugerðarinnar. Reglugerðin er gefin út sem velferðarreglugerð sauðfjár og geitfjár – en síðan er reglugerðin í raun eingöngu skrifuð út frá sauðfé. Reynt er að bæta úr því í endurskoðaðri reglugerð,“ segir Sigurbjörg.
Hún bætir við að aukin þekking á velferðarþáttum sauðfjár og geitfjár hafi komið fram og reynt sé að hafa hliðsjón af því við endurskoðunina.
Sauðfé og geitfé ólíkar dýrategundir
Í greinargerð með breytingartillögunum kemur fram að breytingar á 5. grein séu til að árétta og tilgreina nákvæmar um almenna meðferð á fé, svo sem að halda fé í hjörðum, daglegt eigið eftirlit yfir vetrartímann, nánar um rúning á sauðfé og sértæka umhirðu geita. Sett er inn ákvæði um skyldu til að fjarlægja hræ úr umhverfi lifandi dýra. Til að forðast misræmi í reglugerðum eru tekin út ákvæði sem fjalla um sértækar smitvarnir með tilliti til riðuveiki.
Breytingar á 6. grein eru til að árétta að sauðfé og geitur eru ólíkar dýrategundir með misjafnar þarfir sem rétt er að tilgreina með ákvæðum. Einnig er áréttað að beit og fóður sé ávallt nægjanlegt og aðgengi að hreinu vatni sé ávallt til staðar.
Bannað að æxla saman geitfé og sauðfé
Þá bætist nýr málsliður við 9. grein: „Bannað er að æxla saman geitfé og sauðfé.“ Í greinargerðinni segir að breytingarnar séu til þess að árétta ákvæði 19. gr. laga um velferð dýra sem fjallar um takmarkanir á æxlun dýra. Bann við æxlun sauðfjár og geitfjár er til að árétta að sauðfé og geitur eru ólíkar dýrategundir.
Loks má nefna breytingar á 14. grein, sem eru til að árétta að sauðfé og geitur eru ólíkar dýrategundir með misjafnar þarfir og tilgreint að ekki megi halda sauðfé og geitur saman í kró og að geitur eigi að geta farið upp á palla í mismunandi hæðum. Einnig er ákvæði um að allt fé eigi að geta legið samtímis og að lágmarks legurými skuli vera úr efni með litla varmaleiðni sé gólfið úr málmi.
Opið er fyrir umsagnir í samráðsgátt til 7. nóvember.
