Blesastaðir 1a

„Við fluttum á Blesastaði árið 1997. Þá var hér rekið myndarlegt kúabú sem við breyttum yfir í hrossarækt strax á fyrsta árinu.Við fáum um 20 folöld á ári sem svo flest eru seld einhvern tíma á lífsleiðinni,“ segja ábúendurnir.

Býli: Blesastaðir 1a.

Staðsett í sveit: Á Skeiðunum í Skeiða- og Gnúpverjahreppi.

Ábúendur: Magnús Trausti Svavarsson og Hólmfríður Birna Björnsdóttir ásamt dætrum okkar, Karen, Hrafnhildi og Heklu Salome.

Fjölskyldustærð (og gæludýra): Fimm manna fjölskylda, hundurinn Hera og kötturinn Tási.

Stærð jarðar? Um 330 ha.

Gerð bús? Hrossaræktarbú.

Fjöldi búfjár og tegundir? Við erum með um 150 hross.

Hvernig gengur hefðbundinn vinnudagur fyrir sig á bænum? Morgungjafir 07.30 og svo morgunmatur hjá okkur.

Eftir það er farið í tamningar og útreiðar fram eftir degi, svo er útigangi gefið og kvöldgjafir um kl 18.00.

Skemmtilegustu/leiðinlegustu bústörfin? Það er mjög gaman að fá vel heppnuð folöld en akstur á rúllum virðist venjast illa.

Hvernig sjáið þið búskapinn fyrir ykkur á jörðinni eftir fimm ár? Með svipuðu sniði, bara fleiri gæðingar.

Hvar teljið þið að helstu tækifærin séu í framleiðslu íslenskra búvara? Við teljum að helstu tækifærin liggi í heilbrigði, hreinleika og gæðum íslenskra búvara og mikilvægt sé að nálgast neytendur út frá því.

Hvað er alltaf til í ísskápnum? Þær vörur sem enginn vill.

Hver er vinsælasti maturinn á heimilinu? Lax og nautakjöt.

Eftirminnilegasta atvikið við bústörfin? Eitt af því er þegar hryssan Gýgja frá Blesastöðum náði heilsu eftir erfiða köstun þar sem henni var ekki hugað líf og hefur síðan átt þrjú afkvæmi sem aldrei var reiknað með og er í fullu fjöri í dag.