Banani sem helst gulur
Breskir vísindamenn hafa þróað erfðabreytta banana sem verða ekki brúnir.
Bananarnir eru þróaðir af breska fyrirtækinu Tropic og hefur það fengið heimild til ræktunar þeirra á Filippseyjum. Forsvarsmenn fyrirtækisins segja þessa banana koma sér vel í baráttunni gegn matarsóun. Eftir að hafa verið afhýddir eiga bananarnir að haldast ferskir í tólf klukkustundir. Þeir eiga jafnframt að þola meira hnjask í flutningum án þess að verða brúnir. Frá þessu greinir Guardian.
Tropic hefur jafnframt þróað banana sem eru lengur að þroskast en hefðbundnir bananar og eru þeir væntanlegir á markaði á þessu ári. Samkvæmt fulltrúa Tropic eru bananar fjórða mest ræktaða nytjaplanta heimsins, en jafnframt ein af þeim matvörum sem eru með minnsta geymsluþolið. Því hefur verið haldið fram að allt að helmingur banana fari til spillis og endi ekki sem fæða.
Erfðabreytingin felst í því að fjarlægja gen sem stjórnar framleiðslu ensíma er nefnast Polyphenol oxidase og gefa banönum brúnan lit. Sams konar erfðabreytingu hefur verið beitt til að stöðva framleiðslu sömu ensíma í eplum sem hafa verið seld í Bandaríkjunum frá árinu 2017. Minnkuð framleiðsla á Polyphenol oxidase hefur jafnframt gefið góða raun við framleiðslu á sveppum, tómötum, melónum og kíví.
