Átta sækja um embætti landgræðslustjóra
Höfundur: MHH / smh
Umsóknarfrestur um starf landsgræðslustjóra rann út 20. mars síðastliðinn. Átta umsækjendur eru um embættið en valnefnd skipuð þremur einstaklingum mun meta hæfni og hæfi umsækjenda og skila greinargerð til umhverfis- og auðlindaráðherra, sem skipar í embættið til fimm ára.
Umsækjendurnir eru:
- Anna Guðrún Þórhallsdóttir, prófessor hjá Landbúnaðarháskóla Íslands
- Árni Bragason, forstjóri NordGen
- Benedikt Arnórsson, bóndi
- Eydís Líndal Finnbogadóttir, forstöðumaður sviðs miðlunar og grunngerðar hjá Landmælingum Íslands
- Guðmundur Stefánsson, sviðsstjóri á landverndarsviði hjá Landgræðslu ríkisins
- Rannveig Anna Guicharnaud, jarðvegsfræðingur hjá Resource and Climate Consultancy
- Rodrigo Ademar Martinez Catala, Environmental Educator hjá Camping La Belvedere
- Þórunn Pétursdóttir, sérfræðingur hjá Landgræðslu ríkisins
Í auglýsingu ráðuneytisins kemur fram að unnið er að endurskoðun laga um landgræðslu, meðal annars um starfsemi stofnunarinnar. Markmiðið er sagt að efla starf við gróður- og jarðvegsvernd, uppgræðslu og sjálfbæra landnýtingu. Nýr landgræðslustjóri mun fá það verkefni að framfylgja breytingunni.
Sveinn Runólfsson landgræðslustjóri lætur af störfum vegna aldurs þann 30. apríl næstkomandi eftir 44 ára starf.
