Ásaspurning – en hvað er tromp?
Þegar ég lærði bridds fyrir hálfri öld voru ásarnir í spilinu bara fjórir. Og oftast var spurt um fjölda þeirra með fjórum laufum. Fjögur lauf voru ásaspurning. Og fjögur grönd spurðu um kónga. Maður sumsé hóf ferðalagið mikla á vínarkerfinu góða. Síðan hefur mikið vatn til sjávar runnið og mörg sögnin og margt afkastið orðið manni að skaða! En miklu oftar til gleði.
Langt er síðan fimmti ásinn bættist við hjá nútímabriddspilurum. Nú er fimmti ásinn talinn trompkóngur. Svo er hægt að spyrja um trompdrottningu og ég veit ekki hvað og hvað. En samt kemur enn fyrir að enginn veit neitt í sinn haus er kemur að þessum spurningum öllum. Þrátt fyrir allar umbæturnar, þrátt fyrir nýju sagntæknina, fimmta ásinn, trompdömuna og kerfin öll.
16. þessa mánaðar fór fram lokamót Sumarbridge í Síðumúlanum. Keppt var um silfurstig og þátttaka var góð. Gömlu brýnin, Guðmundur Páll Arnarson, heimsmeistari frá 1991, og tannlæknirinn og laxveiðimaðurinn Þórarinn Sigþórsson hirtu gullið.
Strax í fyrsta spili þessa móts reyndi á sagntækni para. Eins og lesendur sjá á stöðumynd dagsins eru 14 slagir í gröndum en aðeins tvö pör komust þó í alslemmu. Á einu borðinu opnaði norður á sterku laufi, 16 plús. Makker hans sagði hjarta sem lofaði átta plús punktum og fimmlit. Norður tók þá undir hjartað með tveimur hjörtum. Suður meldaði þrjú lauf og þá sagði norður fjögur lauf, enda 7 lauf albesta alslemman þótt ekki séu nú miklar líkur á að hjartað liggi 5-0.
En nú var komið upp sagnvandamál. Þegar suður meldaði 4 grönd og fékk svar við ásaspurningunni, lék vafi á því við borðið hvort norður væri með svari sínu við lykilspilaspurningu að samþykkja hjarta sem tromp eða lauf? Lokasögnin varð því svolítið af ætt Salomons, 6 grönd sem var nálægt meðalskori.
Spilið er kannski ágætt tilefni til að þú og þinn makker ræðið hvort þið hafið alltaf á hreinu hvort ásaspurning eða lykilspilaspurning gildir um fyrstu samþykktu trompsamlegu eða aðra sem síðar kann að koma í ljós – og í einhverjum tilvikum getur verið vænlegri?
Umsjón: Björn Þorláksson,
bjornthorlaksson[hjá]gmail.com
