Áætlun um endurnýjun
Evrópusambandið hefur kynnt nýja áætlun til að laða fleiri unga bændur að landbúnaði og tryggja kynslóðaskipti í greininni.
Aðeins 12% bænda innan ESB eru yngri en 40 ára og meðalaldur er 57 ár, sem framkvæmdastjórn ESB varar við að geti ógnað fæðuöryggi, að því er kemur fram í frétt Euronews.
Áætlunin, sem kynnt var 21. október, miðar að því að tvöfalda hlutfall ungra bænda í Evrópu fyrir árið 2040, úr 12% í 24%. Til að ná þessu markmiði hyggst framkvæmdastjórnin innleiða „startpakka“ í næstu sameiginlegu landbúnaðarstefnu (CAP), sem gæti veitt allt að 300.000 evrur í stuðning til nýrra bænda. Auk þess er lagt til að aðildarríki verji að minnsta kosti 6% af landbúnaðarútgjöldum sínum í aðgerðir sem styðji unga bændur.
Fram kemur m.a. að önnur úrræði felist t.d. í því að opna Erasmus-áætlunina fyrir unga frumkvöðla í landbúnaði, stofna evrópska landbúnaðarlandsskrá til að auðvelda aðgang að ræktarlandi og koma í veg fyrir landspákaupmennsku. Þá á að bjóða afleysingaþjónustu sem geti leyst bændur af hólmi í veikindum eða fríum, þjónustu sem þegar er til í Belgíu.
Euronews vitnar í belgíska bóndann Matteo Godfriaux, 23 ára, sem segir að „þegar þú ert 23 ára og vilt taka við búi, þá held ég ekki að bankinn láni þér 1 til 1,5 milljón evra“. Hann bendir einnig á að land sé dýrt: „Við erum að tala um hektara á 100.000 evrur til að framleiða korn fyrir 150 evrur tonnið.“ Framkvæmdastjórnin segir að þessi áætlun sé „lykilskref til að tryggja framtíð landbúnaðar í Evrópu“ og bregðast við hættu á skorti á nýliðun í bændastétt.
