Grábrókarveita til vandræða
Grugg í vatni svonefndrar Grábrókarveitu í Borgarfirði hefur verið viðvarandi vandamál í hátt í tvo áratugi. Sveitarstjórn Borgarbyggðar hefur skorað á Veitur að taka málið föstum tökum.
„Iðulega myndast grugg í vatni úr Grábrókarveitu. Það ástand hefur varað í áraraðir sem kemur niður á íbúum, gestum og atvinnurekstri,“ segir í fundargerð sveitarstjórnar Borgarbyggðar frá 15. janúar sl. Frá því að Grábrókarveita var tekin í notkun fyrir 18 árum, hafi ítrekað komið upp vandamál vegna óhreininda í vatninu, sem hafi leitt til þess að dregið hefur verið úr notkun veitunnar m.a. með því að hefja aftur vatnstöku á Seleyri fyrir Borgarnes.
„Veitum hefur á þessum 18 árum ekki tekist að gera lagfæringar á vatnstöku veitunnar sem tryggja ásættanleg gæði vatns úr tengipunktum á leið veitunnar. Borgarbyggð sem einn notandi Grábrókarveitu hefur verið í reglulegu sambandi við Veitur um gæði vatns á Varmalandi án árangurs og hefur samþykkt að hefja skoðun á möguleikum á nýjum vatnstökustöðum í nágrenni Varmalands, vegna getuleysis Veitna við að útvega ásættanlegt vatn,“ segir enn fremur.
Sveitarstjórn Borgarbyggðar skorar á Veitur að leysa úr vandamálum sem tengjast vatnssöfnun Grábrókarveitunnar þannig að Borgarbyggð og aðrir notendur geti nýtt vatn úr Grábrókarveitu til framtíðar, í stað þess að hefja vatnstöku sjálf. „Staðan í dag er því miður þannig að ekki verður lengur unað við hana,“ segir í bókun sveitarstjórnar sem samþykkt var samhljóða.
