Vantar heimavist fyrir Fjölbrautaskóla Suðurlands
Mjög brýnt er fyrir Fjölbrautaskóla Suðurlands á Selfossi að fá varanlegt húsnæði undir heimavist en nú eru bara nokkur herbergi í leiguhúsnæði í húsnæði þar sem Ljósheimar, dvalarheimili aldraðra var í á Selfossi.
Húsaleigusamningurinn rennur út við lok þessarar annar. „Það þarf að finna úrræði til frambúðar og besti kosturinn væri að byggt væri almennilegt húsnæði fyrir heimavist í eigu ríkisins, og væri þá hannað með tilliti til þess. En það er ekki í mínum höndum að ákveða hvort og hvenær er byggt, það er pólitísk ákvörðun og fer eftir forgangsröðun ríkisstjórnar.
Við þetta má bæta að einnig er þörf á að stækka verknámshúsið og byggja upp á Reykjum þar, sem Garðyrkjuskólinn er. Því er erfitt að svara hvað gerist þegar tímabundinn leigusamningur rennur út, það fer eftir stöðunni þá, hvort komið sé vilyrði fyrir byggingu heimavistar eða ekki,“ segir Soffía Sveinsdóttir, skólameistari.
Framkvæmdasýsla ríkisins mun auglýsa útboð vegna nýrrar heimavistar en Soffía vann útboðslýsingu í góðu samstarfi við Barna- og menntamálaráðuneytið. „Heimavistamálin hafa verið mikið rædd í skólanefnd skólans og í stjórn Samtaka sunnlenskra sveitarfélaga. Sveitarfélögin, einkum þau sem eru staðsett langt frá skólanum eru uggandi um stöðuna og ég tek undir það“, segir Soffía.
