Sumarið var garðyrkjubændum gott
Höfundur: Margrét Þóra Þórsdóttir
„Það er óhætt að segja að á sunnanverðu landinu hafi þetta verið eitt besta sumar í manna minnum,“ segir Helgi Jóhannesson, garðyrkjuráðunautur hjá Ráðgjafarmiðstöð landbúnaðarins.
Uppskera er með besta móti eftir hagstætt sumar og nú er að sjá hvernig haustið leikur landsmenn, haustrigningar sem algengar eru í fjórðungnum hafa á stundum gert grænmetisbændum lífið leitt.
Engin vorhret eða önnur áföll
Helgi segir að allt hafi fram til þessa fallið með grænmetisbændum á Suðurlandi, þar sem stærstur hluti ræktunarinnar fer fram.
„Vorið kom á réttum tíma og sumarið sem á eftir fór var hlýtt og raki nánast eftir þörfum. Að þessu sinni þurftum við ekki að glíma við vorhret eða önnur áföll. Almennt var veðurfar í meðallagi í öllum landshlutum,“ segir hann.
Þær tegundir sem hafa skamma viðdöl á markaði, eins og blómkál og spergilkál, uxu að sögn Helga nánast of hratt, framboð dreifðist því á fáar vikur. „Það sem menn ætluðu sér að uppskera í september kom allt upp í ágúst,“ segir Helgi.
Haustveðrið ræður miklu um framhaldið
Það grænmeti sem ræktað er til geymslu, eins og til að mynda gulrófur, hvít- og rauðkál, kínakál, gulrætur og kartöflur, er enn í ökrum, en væntanleg uppskera fer í hús á næstu vikum.
„Það lítur allt út fyrir að sú vara verði góð og í miklu magni, þannig að miklar annir eru framundan að ná uppskerunni í hús.
Það ræðst svo af veðri næstu daga og vikur hvernig gengur að uppskera. Miklar haustrigningar hafa oft gert grænmetisbændum lífið leitt, tafið fyrir og jafnvel skemmt uppskeru. Þannig að það má orða það svo að ekki sé sopið kálið þótt í ausuna sé komið. Hins vegar er staðan þannig að verði haustið gott þurfa grænmetisbændur alls ekki að kvarta,“ segir Helgi.
