Stefnumót matvælaframleiðenda og ferðaþjónstuaðila

Markmið viðburðarins var að efla tengsl, stytta virðiskeðjuna og tryggja að gestir á svæðinu gætu notið matvæla beint frá framleiðendum á fjölmörgum veitingastöðum, hótelum og mötuneytum í héraðinu.

Skilvirk dreifing ferskvara

Viðburðurinn fór fram í Félagsheimili Hrunamanna þar sem 18 framleiðendur kynntu vörur sínar fyrir gestum. Að sögn Dóru Svavarsdóttur, formanns Slow Food á Íslandi sóttu um 100 manns viðburðinn, sem hófst á framsöguerindum.

Knútur Rafn Ármann frá Friðheimum fjallaði um matarminjagripi og hvernig megi nýta vannýtt hráefni í vörur sem ferðamenn geta tekið með sér heim. Óli Finnsson í Heiðmörk ræddi mikilvægi fullnýtingar afurða og ávinninginn af góðu samstarfi í virðiskeðjunni. Hann nefndi sérstaklega „Helvítis eldpiparsulturnar“, sem nýta hráefni frá honum og hafa orðið vinsælar. Þá kynnti Tjörvi Bjarnason viðskiptamódel Matlands, matarmarkaðstorgs á netinu, og hvernig sjálfsafgreiðslustöðvar geti gert dreifingu ferskra afurða skilvirkari.

Mikilvægi slíkra viðburða

Dóra Svavarsdóttir frá Slow Food flutti erindi og lagði áherslu á mikilvægi slíkra viðburða. „Það skiptir sköpum að gera sýnilegt hvað svæðið hefur upp á að bjóða. Fyrir fólk í veitingageiranum og ferðaþjónustunni er það ómetanlegt að geta með stolti sagt hvaðan hráefnið kemur og hvert er fólkið og sagan á bakvið réttina sem bornir eru fram,“ sagði hún.

Rakel Theodórsdóttir, byggðaþróunarfulltrúi Uppsveitanna, sagði að lengi hefði verið talað um sjálfbærni og mikilvægi fæðuöryggis þjóðarinnar. Nú sem aldrei fyrr væri þetta ljóst, sérstaklega út frá heimsmálunum. Það væri því hagur allra sem starfa og búa í Uppsveitunum að versla í heimabyggð og með svona viðburði væri opnað á aukið samtal og sýnileika þeirra aðila sem eru á bak við þessa blómlegu matarkistu sem Uppsveitirnar séu.