Píla pína

Leikfélag Hveragerðis, sem hefur glatt gesti og gangandi í rétt tæp áttatíu ár núna, undirbýr af kappi uppsetningu á ævintýrasöngleiknum um músina sem allir þekkja, hana Pílu pínu.

Leikfélagið var stofnað á vetrarmánuðunum 1947, örlítið yngra en Hveragerðisbær sem fagnar stórafmæli sínu með fjölbreyttri afmælisdagskrá nú allt árið. Þótti vel við hæfi að setja söngleikinn upp af því tilefni, heiðra verk höfundarins sem bjó um árabil í Hveragerði, en Píla pína er þekkt og ástsælt íslenskt barnaleikrit og ævintýrasaga eftir skáldið Kristján frá Djúpalæk. Hann er einnig höfundur ljóðanna, sem eru flutt undir lögum Heiðdísar Norðfjörð og Ragnhildar Gísladóttur.

Aðalpersónan er litla, hugrakka og lífsglaða músin Píla pína sem býr í músabyggðinni í Lyngbrekku og lendir í ýmsum ævintýrum. Verkið kom upphaflega út sem bók og hljómplata árið 1981 og hefur tónlistin úr verkinu, svo sem lögin „Strengir“ og „Saknaðarljóð Gínu mömmu“ fylgt mörgum kynslóðum Íslendinga. Sagan hefur nokkrum sinnum verið sett á svið sem ævintýrasöngleikur hjá atvinnu- og áhugaleikfélögum um allt land en nú tekur leikstjórinn Gunnar Gunnsteinsson við taumunum hjá leikfélagi Hveragerðis og er næsta víst að sýningin eigi eftir að gleðja marga.

Öll tónlist hefur verið sett í nýjan búning og ljá nýjar útsetningar verkinu ferskan blæ. Leikritið um Pílu pínu skipar stóran sess í hjörtum margra Íslendinga, en saga hennar og ævintýri hafa glatt margar kynslóðir barna. Áætlað er að frumsýna í byrjun október og miða má nálgast á tix.is innan skamms.