Nýr miðbær byggður upp í Þorlákshöfn
Nú styttist í að framkvæmdir fari að hefjast við nýjan miðbæ í Þorlákshöfn.
Þar verða meðal annars 140 íbúðir, auk verslana og þjónusturýma, hótels, menningarsalar og veitingastaða. Skrifað var undir samkomulag um miðjan desember um byggingu miðbæjarins á milli Sveitarfélagsins Ölfuss og Fasteignafélagsins Arnarhvols. Samkomulagið miðar við að hönnun hefjist strax og fyrstu byggingarnar verði fullbúnar fyrir lok ársins 2025 eða fyrri hluta 2026.
Fimm hundruð ný störf
„Þorlákshöfn hefur verið að vaxa mjög hratt á síðustu árum. Hér er sótt á forsendum verðmætasköpunar og á næstu fimm árum er fyrirhugað að störfum fjölgi um allt að fimm hundruð, mest vegna umhverfisvænnar matvælaframleiðslu, vaxandi ferðaþjónustu og nýsköpunar.
Við lítum á það sem mikilvægan þátt í uppbyggingaráformum okkar að styðja við það sterka mannlíf sem hér er og auka þjónustu við íbúa og gesti. Þar getur vel heppnaður miðbær leikið lykilhlutverk.
Það eru því forréttindi að fá til liðs við okkur fyrirtæki eins og Arnarhvol sem deilir með okkur trúnni á þetta samfélag,“ segir Elliði Vignisson bæjarstjóri.
Aðeins hálftíma frá Reykjavík
Karl Þráinsson, framkvæmdastjóri Arnarhvols, er mjög spenntur fyrir nýja miðbænum og öllu því sem er að gerast í Ölfusi. „Ég held að það hafi ekki farið fram hjá nokkrum manni hversu mjög Ölfus og Þorlákshöfn hafa styrkst á seinustu árum.
Ekki eingöngu fjölgar íbúum heldur eru stór og sterk fyrirtæki að velja sér hér framtíðarstaðsetningu sem skapar sérstöðu og velsæld. Til viðbótar við það þá er Þorlákshöfn ekki í nema rétt um 30 mínútna akstursfjarlægð frá Reykjavík,“ segir Karl og heldur áfram:
„Sveitarfélagið hyggur á enn frekari sókn og eflingu innviða svo sem með því að byggja fjölnota íþróttahús, byggja nýjan leikskóla, stækka höfnina, byggja íbúðir fyrir eldri borgara og efla enn frekar sundlaugina.
Þorlákshöfn er því orðin frábær valkostur fyrir ungt fólk sem vill njóta þess að ala upp börn í nánu samfélagi við hátt þjónustustig. Á þeim forsendum leggjum við í þetta samstarf.“
