Nýliðar hvattir til að afla sér tilskildra leyfa
Höfundur: Margrét Þóra Þórsdóttir
Alls eru 134 gististaðir á skrá hjá Heilbrigðiseftirliti Norðurlands vestra. Flestir eru smáir eða 84, en þeir fá skoðun annað hvert eða jafnvel fjórða hvert ár. Til undantekninga heyrir að verið sé að selja gistingu í óleyfi.
Fram kemur í frétt á heimasíðu Heilbrigðiseftirlits Norðurlands vestra að það sé helst í Skagafirði sem nýir aðilar án leyfis hafi birst á Airbnb-vefnum upp á síðkastið. „Það er ljóst að mikil eftirspurn er eftir gistingu í Skagafirði í tengslum við Landsmót hestamanna sem haldið verður að Hólum dagana 27. júní til 3. júlí nk. og eru greinilega margir sem hyggjast bjóða upp á húsaskjól gegn greiðslu,“ segir á vefnum en þar hvetur Heilbrigðiseftirlitið þá nýliða sem ekki hafa aflað sér tilskildra leyfa að drífa í því.
