Mikið að sækja í kynbótum í skógrækt
Þorsteinn Tómasson, fyrrverandi forstjóri Rannsóknastofnunar landbúnaðarins, er viðmælandi Sveins Margeirssonar í hlaðvarpsþættinum Víða ratað. Þeir ræða m.a. um kynbætur í trjárækt en Þorsteinn hefur um árabil unnið að þeim. Hann segir að erfðaframfarir hafi orðið miklar í skógrækt á síðustu áratugum. Nefnir hann sem dæmi skógarfuru á Norðurlöndum þar sem skógfræðingar segja að erfðaframfarir séu um 2% á ári, þ.e. með tilliti til aukins vaxtarhraða og afkasta.
Þorsteinn ræðir einnig um þróun líftækninnar og rifjar upp samstarf Rala og Orf líftækni. Dæmi um það þegar ríkisfyrirtækið fóstraði einkafyrirtæki sem hefur náð miklu flugi á síðustu árum.
Hann telur ráðlegt að gerð verði greining á því hvernig til hefur tekist á síðustu árum eftir sameiningar stofnana Rala og LbhÍ. Þá hafi ráðgjafarþjónusta í landbúnaði breyst hratt og nauðsynlegt að rýna í árangur sem þar hafi náðst.
Þorsteinn varar við of mikilli áhættusækni í landbúnaði og skyldum greinum og nefnir þar laxeldi og hörrækt þar sem menn fóru af stað á árum áður án grunnrannsókna. „Þetta fór ekki nógu vel í upphafi þó menn hafi náð tökum á þessu seinna,“ segir Þorsteinn Tómasson.
Þátturinn Víða ratað er hýstur undir merkjum Hlöðunnar, hlaðvarps Bændablaðsins, á öllum helstu streymisveitum. Hægt er að hlusta á hlaðvarpsþáttinn hér undir.
