Metuppskera af þurrkuðu korni

Afar hagstæð veðurskilyrði voru á Íslandi í sumar og haust til kornræktar, sem skilaði sér í mestri uppskeru frá því að farið var að halda formlega utan um uppskerutölur í samræmdu skýrsluhaldi árið 2019.

Alls voru uppskorin rúm 12 þúsund tonn af þurrkuðu korni, þegar búið er að umreikna votverkað korn til jafns við þurrkað. Það er rúmlega 2.400 tonnum meira en árið 2022 þegar næstmesta kornuppskeran var.

Áfram er sú þróun að kornbændum fækkar á Íslandi, þeim fækkaði núna um sex á milli ára en eru 50 færri sé litið til ársins 2019. Aukning varð hins vegar í umfangi kornræktar núna á milli ára. Í byggræktun var ræktað á 3.333 hekturum í ár, sem er 216 hektara stækkun á ræktarlandi frá síðasta ári, en byggið er langumfangsmesta kornræktartegundin. Heildaraukning í kornrækt nam 169 hekturum – þar sem meðtalið er auk byggsins, hafrar, vorhveiti, vetrarhveiti og vetrarrúgur.

Þurrkað korn nær 50% í heildaruppskeru

Á síðustu sjö árum er það aðeins á árinu 2022 sem fleiri hektarar voru undir byggrækt, eða 3.384. Þá var heildar kornuppskera 9.647 tonn og fékkst 3,1 tonn af þurrkuðu korni á hektara að meðaltali. Núna fengust 3,8 tonn af þurrkuðu korni á hektara. Síðasta ár var einstaklega óhagstætt kornræktarár, en þá fékkst um 2,2 tonn af þurru korni á hvern hektara og heildaruppskeran rúm 5.800 tonn af þurrkuðu korni.

Í fyrsta skipti nær þurrkað korn 50% í heildaruppskeru. „Það er áhugavert að sjá að hlutfall þurrkaðs korns er að hækka sem er eðlilegt, sérstaklega núna með stuðningi stjórnvalda við að byggja upp þurrkstöðvar. Síðan er ánægjulegt að sjá hvað almennt virðist hafa gengið vel að rækta korn þetta árið og uppskeran tekið kipp,“ segir Borgar Páll Bragason, fagstjóri, rekstrar- og umhverfissviðs Ráðgjafarmiðstöðvar landbúnaðarins.

Kornræktendum fækkar samhliða fækkun bænda

Spurður út í framtíðarsýnina í ljósi stuðningsaðgerða stjórnvalda við greinina, bæði með fjárfestingastuðningi og framleiðslutengdum stuðningi, segir Borgar að hann sjái fyrir sér áframhaldandi þróun.

„Ég held að kornræktendum haldi áfram að fækka samhliða fækkun bænda. Það getur þó vel verið að gott gengi í kornræktinni á þessu ári og almennt mikill heyfengur muni hafa þau áhrif að kornræktendum fjölgi eitthvað á næsta ári en til lengri tíma finnst mér líklegt að kornræktendum haldi áfram að fækka en þeir sem rækta korn verði stórtækari.“