Loðdýrabændur starfa áfram í deild Bændasamtaka Íslands
– Einungis eitt bú enn starfandi
Loðdýrabændur munu áfram starfa í sérstakri búgreinadeild, þó einungis eitt bú standi eftir á Dalsá í Mosfellssveit þar sem feðgarnir Ásgeir Pétursson og Pétur Ásgeirsson stýra búrekstri minkabús.
Í lok síðasta árs bárust fréttir af því að öll fimm minkabúin á Suðurlandi hefðu ákveðið að hætta búrekstri. Í nýrri stjórn deildarinnar eru feðgarnir ásamt Bjarna Stefánssyni í Túni í Flóa, sem þó er hættur búskap á sínu búi.
Trúnaðartraust skortir milli Matvælastofnunar og bænda
Fráfarandi stjórn skipuðu þau Björn Harðarson formaður, Veronika Narfadóttir og Hjalti Logason. Á deildarfundinum voru samþykktar tvær tillögur, báðar sem viðbragð við fréttaflutningi Ríkisútvarpsins í fréttaskýringaþættinum Kveik um meintan slæman aðbúnað minka á nokkrum búum.
Í fyrri tillögunni er því beint til Búnaðarþings Bændasamtaka Íslands að persónugreinanleg gögn úr eftirlitsskýrslum Matvælastofnunar séu ekki gerð opinber. Fundurinn hvetur stjórn Bændasamtaka Íslands til að taka upp samtal við Matvælastofnun til að byggja upp trúnaðartraust milli stofnunarinnar og bænda.
Í rökstuðningi með tillögunni segir að fullur trúnaður þurfi að vera til staðar milli eftirlitsstofnunar og eftirlitsþega enda hafi eftirlitsstofnun eins og Matvælastofnun víðtækar heimildir til inngrips og aðgerða á meðan dýraeigendur hafi takmarkaðan rétt. Þannig sé tekið fram í verklagsreglum Matvælastofnunar að munnleg athugasemd við framkvæmd eftirlits geti talið óásættanleg hegðun eftirlitsþega.
Félagsmenn séu varðir fyrir skipulagðri glæpastarfsemi
Í seinni tillögunni er því einnig beint til Búnaðarþings Bændasamtaka Íslands að gera aðgerðaráætlun til að verja félagsmenn fyrir skipulagðri glæpastarfssemi í sveitum landsins.
Í rökstuðningi segir að nýlega hafi Ríkisútvarpið auglýst í sjónvarpi sínu að auðvelt væri að fremja innbrot hjá bændum og auðvelt væri að finna bæi þar sem auðvelt væri að brjótast inn. Ríkisútvarpið hafi einnig upplýst um að stofnunin væri í samstarfi við aðila sem fremja innbrot hjá bændum. Með skipulagðri glæpastarfssemi sé einnig átt við skipulögð mannorðsmorð íslenskrar ríkisstofnunar á íslenskum borgurum.
