Hrönn nýr formaður skógarbænda
Stjórnar og formannsskipti voru gerð í deild skógarbænda.
Hrönn Guðmundsdóttir er nýr formaður búgreinadeildarinnar. Greinin stendur á tímamótum.
Stjórnarmenn úr öllum landshlutum
Stjórn búgreinadeildar skógarbænda samanstendur af fimm aðalmönnum, einum frá hverjum landshluta, Austur, Vestur , Norður og Suðurlandi og Vestfjörðum auk fimm varamanna þeirra. Hrönn Guðmundsdóttir úr suðri er nýr formaður deildarinnar og henni á vinstri hönd og réttsælis kringum landið sitja Sigurkarl Stefánsson í vestri, Sæmundur Þorvaldsson á Vestfjörðum, Embla Björnsdóttir í norðri og Lilja Sigurðardóttir í austri. Varamenn þeirra í sömu röð eru Kári Steinn Karlsson, Bergþóra Jónsdóttir (ný), Sighvatur Þórarinsson, Birgir Steingrímsson og Helgi Bragason (nýr).
Fjörugar umræður einkenndu fundinn sem var vel sóttur enda búgreinin orðin býsna stór.
Skógrækt á Íslandi stendur á tímamótum því skógar eru víða orðnir hæfir til nytja sem krefst nýrrar þekkingar og nálgunar í greininni auk mögulegra breytinga á regluverkinu. Hrönn sagðist spennt fyrir starfinu fram undan. Hjörtur Bergmann, fráfarandi formaður og eiginmaður nýs formanns, sló á létta strengi og sagði umræðuna munu halda áfram við eldhúsborðið.
