Herbergjum fjölgað á Hótel Sögu
Nú standa fyrir dyrum breytingar á Hótel Sögu þar sem herbergjum verður fjölgað og skrifstofur hótelsins færðar til innan hússins. Þá er fyrirhugað að efla viðhald og endurbætur á fasteigninni á komandi misserum og breyta rekstrarfyrirkomulagi Hótel Sögu ehf.
Starfsmönnum hússins voru á dögunum kynntar fyrirætlanir um að skipta félaginu Hótel Sögu ehf. upp í fasteignafélag og rekstrarfélag. Ingibjörg Ólafsdóttir verður áfram hótelstjóri Hótel Sögu og framkvæmdastjóri rekstrarfélagsins Hótel Sögu ehf. sem annast sem fyrr allan hótel- og veitingarekstur í húsinu. Elías Blöndal Guðjónsson, lögfræðingur Bændasamtaka Íslands, verður framkvæmdastjóri fasteignafélagsins Bændahallarinnar ehf. Skrifstofur hótelsins, sem nú eru í austurhluta norðurbyggingar Bændahallarinnar, verða færðar inn á skrifstofugang Bændasamtakanna. Lífeyrissjóði bænda og búgreinafélögum stendur jafnframt til boða annað skrifstofupláss í húsinu. Í framhaldinu verður allri norðurbyggingu Bændahallarinnar breytt í hótelherbergi eins og lengi hefur til staðið. Þá verður útbúin ný sameiginleg matstofa starfsmanna í Bændahöllinni í gamla Búnaðarþingssalnum á 2. hæð. Við þessar breytingar fjölgar herbergjum um allt að 27 og gert er ráð fyrir að þau verði tilbúin til notkunar í byrjun sumars 2016.
Á næstu mánuðum og árum verður að auki ráðist í umtalsverðar endurbætur á hótelinu, m.a. verða herbergi gerð upp, veitingarými verða endurhönnuð og svæðum fyrir verslun og þjónustu fjölgað. Að sögn eigenda hefur rekstur Hótels Sögu gengið mjög vel undanfarið og nýtingin aukist á milli ára, sérstaklega utan háannar. Nú er því stefnt að enn frekari uppbyggingu að sögn eigenda.
