Gull, reykelsi og myrra

- Myrra sem lækningajurt

Gyllt trjákvoða er unnin úr myrru og nýtt við margvíslegum kvillum.

Myrra hefur verið nýtt sem lækningajurt frá örófi alda. Kolbrún Björnsdóttir grasalæknir notar tinktúru gerða úr myrru í meðhöndlun á meltingarvanda.

Myrra er lítið tré

Myrra er heiti á litlu tré eða runna sem hefur þyrnóttar greinar og vex villt á Arabíuskaga og í Austur Afríku. Á latnesku heitir það Commiphora myrrha og nafnið því dregið beint úr því. Frá aldaöðli hefur tréð verið nýtt til lækninga og þekktust er myrran vafalaust úr sögunni um vitringana þrjá sem færðu Jesú nýfæddum gull, reykelsi og myrru. Reykelsið var að öllum líkindum frankincense. Sögur af myrru koma víðar fyrir í Biblíunni, til dæmis þegar Jesú er fært vín blandað myrru fyrir krossfestinguna. Hann þáði víst ekki sopann. Einnig eru sögur af konum sem báru á sig myrruolíu til fegrunar. 

Notkun í grasalækningum

Fjölbreytt og góð örveru- og bakteríuflóra er lykillinn að góðri meltingu sem aftur hefur mikil áhrif á aðra starfsemi líkamans. Sé meltingin í ólestri á líkaminn erfitt með að taka upp þau næringarefni sem hann þarf úr matnum og önnur líkamskerfi fá þá ekki þá næringu sem þau þurfa til að halda úti eðlilegri starfsemi. Slíkt getur til að mynda valdið bólgum og óþægindum og leitt af sér sjúkdóma.

Grasalæknar dagsins í dag nota myrru sem lækningajurt. Hún er ýmist notuð sem fínmalað duft eða tinktúra en þá hefur þurrkuð kvoðan, sem minnir helst á óreglulega litla gyllta steina, verið látin liggja í etanóli í dálítinn tíma og hún svo þynnt út með vatni til inntöku. Frábendingar eru um að nota myrru á meðgöngu.

Kolbrún Björnsdóttir grasalæknir hefur um áratugaskeið notað myrru til að meðhöndla ákveðin meltingarvandamál þeirra er til hennar leita í Jurtaapótekinu sem nú er orðið hluti af Lyfju. „Ég nota hana mest til að eyða óæskilegum bakteríum úr meltingunni, fyrir fólk sem er með öfuga bakteríuflóru sem kallast, þá er hún mjög öflug í að drepa lífseigar bakteríur neðar í meltingarveginum, í smáþörmunum og ristlinum.“ Fjölmargir á Íslandi nýta sér kosti myrrunnar.

Ilmkjarnaolía úr myrru

Hægt er að eima trjákvoðuna til að vinna ilmkjarnaolíu úr myrrunni sem þá er handhæg í notkun. Ilmkjarnaolíur eru aðeins notaðar í örlitlu magni, töldu í dropum, út í burðarolíur, til dæmis möndlu- eða arganolíu. Helstu kostir myrrunnar eru að hún er góð á bólgur í húð, exem og kláða og er græðandi á sár.  Hún er notuð gegn berkjubólgu og hæsi, í tannlæknavörur og sem ilmefni í snyrtivörur og ilmvötn. Myrruolían er einnig sögð hafa róandi og sefandi eiginleika og því virka vel við kvíða og streitu. Hún er einnig sögð koma reglu á tíðir kvenna. Engan skal því undra að myrruolían hafi verið notuð af konum til forna og að Jesú hafi verið boðinn dreitill á erfiðum tíma.