Gripagreiðslur til fjölgunar geita

Nýtt skýrsluhaldskerfi kemst brátt í gagnið og er mikilvægt til utanumhalds á stofni í útrýmingarhættu.

Kjarngóður fundur fór fram í deild geitfjárbænda. Tvær tillögur um innmat og áhersluatriði í búvörusamningagerð voru samþykktar og mun stjórn deildarinnar fylgja þeim eftir.

Ný stjórn geitfjárræktenda

Hákon Bjarki Harðarson situr áfram sem formaður. Anna María Flygenring gaf ekki kost á sér til áframhaldandi stjórnarsetu en Kristín Halla Bergsdóttir var kjörin í hennar stað. Jóhanna Bergmann Þorvaldsdóttir situr áfram í stjórn og varastjórn skipa Halla Sigríður Hrefnu Steinólfsdóttir og Susanne Lintermann og taka við af Guttormi Hrafni Stefánssyni og Huldu Brynjólfsdóttur.

„Það sem er helst á dagskrá framundan er að koma nýja skýrsluhaldskerfinu í gagnið fyrir vorið og í framhaldinu af því förum við í vinnu við að koma öllum geitum á Íslandi inn í kerfið“, sagði Hákon Bjarki formaður stjórnar að fundi loknum, en fram kom í tillögum sem samþykktar voru á fundinum að lykilatriði sé að hafa gott utanumhald um alla gripi þegar stækkun stofns í útrýmingarhættu er í brennidepli.

Hákon bætir við að „með haustinu förum við í arfgerðargreiningu á geitastofninum vegna riðu og munum taka sýni úr um 1500 gripum“. Það verði gert til að skoða hvort verndandi gen gegn riðu sé í íslenskum geitum, en aldrei hefur greinst riða í geit á Íslandi. „Svo verða það búvörusamningarnir þegar þeir komast á dagskrá“, bætti hann við, en síðari tillaga fundarins laut að áherslum geitfjárræktenda í komandi búvörusamningagerð.

Tillögur um innmat og búvörusamningagerð

Stemningin á fundinum var góð og létt yfir fundarmönnum sem horfðu yfir flugbrautina af fundarstað. Fyrir fundinum lágu tvær tillögur sem báðar voru einróma samþykktar. Sú fyrri að stjórn deildarinnar er falið að ræða við sláturleyfishafa um áform um að hætta að afhenda bændum innmat úr geitum í næstu sláturtíð. Nýting innmatar er geitabændum mikilvæg til að skjóta styrkari stoðum undir tekjuöflun í sínum búrekstri.

Seinni tillagan lýtur að komandi búvörusamningagerð þar sem áhersla er lögð á að fá aukið fjármagn til geitfjárræktar, stofninn sé enn í útrýmingarhættu og sökum smæðar þurfi bændur sjálfir að vinna og selja sínar afurðir ólíkt öðrum búgreinum. Fjölga þurfi geitum í landinu og hvetja til þess með gripagreiðslum og eins að fjárfestingarstuðningur nái til allra búgreina innan Bændasamtakanna auk þess sem stuðningur verði greiddur til tækjakaupa. Í tillögunni er einnig kveðið á um nauðsyn fjármagns til áframhaldandi reksturs hafrastöðvarinnar sem og frír aðgangur að skýrsluhaldskerfinu Heiðrúnu.