Góður sigur strjálbýlisins
Helstu stórveldin í briddsheiminum, Reykjavík og Reykjanes, urðu að lúta í lægra haldi fyrir tveimur sterkum landsbyggðasveitum um helgina þegar kjördæmamótið í sveitakeppni í bridds fór fram í félagsheimilinu á Flúðum.
Hátt í 200 keppnisbriddsspilarar tókust á og þegar upp var staðið hafði sveit Norðurlands eystra unnið öruggan sigur með 474 stig. Sveit Vestfjarða náði silfrinu með 423 stig. Reykjavík varð að láta sér duga þriðja sætið og lið Reykjaness (sem margir töldu sigurstranglegt) endaði í fjórða sæti. Ísak Örn Sigurðsson-Gunnlaugur Karlsson unnu „butlerinn“ í mótinu. með 1.56 í 108 spilum.
Eitt rosalegasta spil mótsins, spil 10, kom fyrir í lokaumferðinni. Austur gefur, NS á hættu. (Sjá stöðumynd).
Sigurliðið græddi 17 impa á tveimur borðum af fjórum í þessu spili og munar um eyðurnar tvær fyrir AV. 20 spilarar skoruðu 600-660 í grandsamningi. Fmm pör í AV spiluðu doblaða hjartasamninga og uppskáru 790- 1070. Hér skipti sköpum að geta opnað á fjöldjöfli í austur eða stelast til að opna á einu hjarta.
Áhugavert er að þar sem norður var sagnhafi í þremur gröndum án þess að AV létu í sér heyra og lítið hjarta kom út á ás vesturs, þá fann enginn framhaldið sem hefði banað samningnum á svipstundu. Lyfta spaðagosa. En þegar hjartagosinn birtist í ásinn er gisk hvort norður hóf leik með KG eða DG í hjarta. Spennandi spil, bridds.
Umsjón: Björn Þorláksson,
bjornthorlaksson[hjá]gmail.com
