Landsvirkjun byggir þjónustumiðstöð
Landsvirkjun er nú með útboð í gangi á lóð undir byggingu þjónustumiðstöðvar, sem mun gegna mikilvægu hlutverki fyrir Vaðölduver, fyrsta vindorkuver landsins.
Auk starfsfólks frá vindmyllu- framleiðandanum „Enercon“ mun starfsfólk Landsvirkjunar einnig hafa aðstöðu í húsinu.
Heildarstærð aðalbyggingarinnar er um 414 fermetrar en þar verður m.a. að finna skrifstofurými, fundarherbergi, kaffiaðstöðu og bílskúr. Á lóðinni, sem er um 9 þúsund fermetrar að stærð, verður einnig lágreist 46 fermetra skýli, sem skiptist í 25 fermetra hjólaskýli og 21 fermetra geymslu. Húsið mun verða Svansvottað og verður þar með annað mannvirki Landsvirkjunar sem hlýtur slíka vottun.
„Mér líst mjög vel á þessi áform, það er alltaf jákvætt þegar fyrirtæki eins og Landsvirkjun, sem er í eigu okkar allra, byggir upp starfsemi á landsbyggðinni. Nýja húsið á Hellu styrkir stöðu staðarins sem þjónustu- og atvinnukjarni á Suðurlandi og er skýr vísbending um að fyrirtækið sjái Hellu fyrir sér sem mikilvægan stað til framtíðar.
Sveitarstjórnin hefur að undan- förnu lagt mikla áherslu við stjórnendur fyrirtækisins að byggja upp varanlegar starfsstöðvar í sveitarfélaginu og er þessi framkvæmd að hluta til afrakstur af því samtali. Fyrir sveitarfélagið skiptir þetta miklu máli bæði beint og óbeint. Hér verður til starfsumhverfi fyrir tæknimenntað fólk, umsvif aukast og fjölbreytni í atvinnu og þjónustu verður meiri og trú fólks eykst á frekari uppbyggingu í heimabyggð,“ segir Eggert Valur Guðmundsson, oddviti Rangár- þings ytra.
