Verð á mjólkurlítranum 210 krónur á tilboðsmarkaði
Nú fyrir helgi tikynnti Matvælastofnun um niðurstöður tilboðsmarkaðar með greiðslumark mjólkur. Jafnvægisverð reyndist vera 210 krónur á hvern lítra.
Í tilkynningu frá Matvælastofnun koma eftirfarandi upplýsingar fram um markaðinn.
„Alls bárust Matvælastofnun 30 tilboð um kaup eða sölu á greiðslumarki. 2 tilboð reyndust ógild.
- Fjöldi gildra tilboða um sölu = 13
- Fjöldi gildra tilboða um kaup = 15
- Greiðslumark sem boðið var fram = 804.676 lítrar.
- Greiðslumark sem óskað var eftir = 1.485.000 lítrar.
- Greiðslumark sem viðskipti ná til eftir opnun tilboða = 724.676 lítrar.
- Kauphlutfall viðskipta er 92,91%
Á meðfylgjandi mynd má sjá niðurstöðu tilboðsmarkaðar þann 1. apríl 2016. Á myndinni er sýnd blá lína framboðs og rauð lína eftirspurnar. Jafnvægisverð sem fram kom á markaðinum reyndist krónur 210 kr./l. eins og áður segir.
Myndræn framsetning sýnir uppsafnað kaup- og sölumagn við ákveðið verð. Skurðpunktur línanna reynist því aðeins vera niðurstaða á uppboðinu ef ofangreint hlutfall kaup og sölumagns reynist vera jafnt og 1. Sé hlutfallið aftur á móti undir einum þá er skurðpunktur línanna ekki birtingarmynd á jafnvægisverði né jafnvægismagni.
Þeir sem lögðu inn tilboð um sölu á greiðslumarki á verði 210,- kr./l. eða lægra selja nú greiðslumark sitt.“
