Tveggja tíma barátta við fimm punda lax
Höfundur: Gunnar Bender
„Þetta var gaman en verulega erfitt, en fiskurinn flækti sig utan um steina og þetta var bara slagur“ sagði Arnþór Helgi Hálfdánarson sem var að koma úr Hvolsá og Staðarhólsá í Dölum með sex laxa og þann stærsta í ánni í sumar, 12,6 punda fisk.
En sá síðasti og minnsti hjá Adda var erfiðastur, en hann tók í lóninu fyrir ofan mannvirkin í ósnum og flækti sig í grjótgarði fyrir neðan. Baráttan stóð yfir í tvo tíma en Addi gafst alls ekki upp og að lokum þegar minnkaði aðeins í lóninu, náði hann að landa laxinum fyrir neðan eftir mikla og langa baráttu.
„Já þessi var erfiður en aðstæður ekki mjög góðar þarna, þetta var langerfiðasti fiskurinn en sá minnsti sem ég veiddi í ferðinni. Fékk alls sex laxa og sá stærsti var 12,6 pund. Þetta er skemmtilegt en veiðisvæðið þarna í Dölunum getur stundum verið erfitt,“ sagði Arnþór Helgi skömmu eftir að hann landaði laxinum erfiða í lóninu.
Hollið veiddi 16 laxa og 10 bleikjur, en mikið var að ganga af laxi í vatna-svæðið.
