Matvælasjóður úthlutar rúmum 566 milljónum króna
Höfundur: smh
Matvælasjóður hefur úthlutað í annað sinn og að þessu sinni 566,6 milljónum króna til 64 verkefna. Umsóknir um styrki voru 273.
Tilkynnt var um úthlutunina á vef atvinnuvega- og nýsköpunarráðuneytisins í dag. Þar kemur fram að fjögur fagráð hafi verið stjórn sjóðsins til ráðgjafar, eitt í hverjum styrkjaflokki. Verklagið var með þeim hætti að fagráðin skiluðu til stjórnar forgangsröðun verkefna eftir einkunnum ásamt umsögnum um hvert verkefni fyrir sig. Stjórn Matvælasjóðs skilaði síðan tillögum til ráðherra sem ráðherra féllst á. Öllum umsækjendum mun berast svar við umsóknum sínum ásamt umsögn um verkefnin.
Í tilkynningunni kemur fram að dreifing verkefna sem fengu styrk sé nokkuð jöfn milli landshluta.
Meðal verkefna sem hljóta styrk eru:
- Útfærsla hugmynda og prófun á fæðubótarefni úr tilteknum spírum og sykrum úr þörungum.
- Vöruþróun á millimáli og ídýfum úr broddmjólk.
- Tilraun til notkunar þangsafa við vökvaræktun grænmetis.
- Tilraunir og vöruþróun á ætum rósum.
- Verkefni um að framleiða umhverfisvænni matvælaumbúðir.
- Framleiðsla á hafraskyri úr íslenskum höfrum.
- Hagkvæmnisathugun fyrir uppsetningu frostþurrkunarvers fyrir matvæli á Íslandi
- Fullvinnsla á grjótkrabba og aukaafurðum af próteinríkum.
- Verkefni um framleiðslu á húðvörum úr íslenskum jurtum og hliðarafurðum matvælaframleiðslu.
- Áhrif endurnýjunar íslenska fiskiskipaflotans á kolefnisspor afurða.
- Verkefni um hreina fiskiolíu í vesturvíking.
