Nýsköpunarvinnustofa á Hvanneyri

Höfundur: Katrín Lilja Jónsdóttir

Dagana 16.-17. mars næstkomandi verður nýsköpunarvinnustofa í Landbúnaðarháskóla Íslands á Hvanneyri á vegum LbHÍ og Gleipnis, nýsköpunar- og þróunarseturs á Vesturlandi. Þetta er í fyrsta sinn sem slík vinnustofa er haldin.

„Hugmyndin er að nota sprotafyrirtæki sem þegar eru starfandi sem dæmi um hvernig hægt er að þróa hugmynd frá upphafi yfir í raunverulegt verkefni, og hvernig má fylgja henni eftir og láta hana vaxa,“ segir Alexander Schepsky, framkvæmdastjóri Gleipnis.

Á staðnum verða sjö nýsköpunarfyrirtæki; Svepparíkið, Sveppasmiðjan, Lava Seaweed, Hvammsskel, Stormur, Hringvarmi og Sea Growth.

„Við vonumst til að fá hugmyndir frá nemendum LbHÍ um hvernig megi draga úr matarsóun, nýta betur hliðarstrauma í landbúnaði og sjávarútvegi, spara orku eða nýta glatvarma á skilvirkari hátt,“ segir Alexander.

Hægt er að kynna sér vinnustofuna frekar á vefsíðu LbHÍ. „Við vonum að þetta kveiki umræðu og samstarf um hvernig megi nýta betur þær auðlindir sem Ísland hefur upp á að bjóða,“ segir Alexander að endingu.

Svepparíkið	Þróar sjálfbært ræktunarkerfi fyrir sælkerasveppi sem nýtir lífræna hliðarstrauma úr landbúnaði í hringrásarvæna matvælaframleiðslu.
Sveppasmiðjan	Byggir upp samþætt aquaponics-kerfi þar sem sveppir, grænmeti og fiskar eru ræktaðir saman í sjálfbæru framleiðslu- og rannsóknarumhverfi.
Lava Seaweed	Þróar landbundna ræktun á rauðþörungum sem nýtir næringarríkt frárennslisvatn úr fiskeldi í hringrásarkerfi.
Hvammsskel	Fjölskyldurekið fyrirtæki sem vinnur að uppbyggingu bláskeljaræktar í Hvammsfirði og aukinni framleiðslu íslenskrar skeljar.
Stormur	Þróar lausnir þar sem gagnaver eru staðsett þannig að orka og afgangshiti nýtist betur í samfélaginu.
Hringvarmi	Nýtir afgangshita frá gagnaverum til að knýja staðbundnar einingar fyrir matvælaframleiðslu og bæta orkunýtingu.
Sea Growth	Þróar frumuræktað sjávarfang þar sem fiskfrumur eru ræktaðar til að framleiða sjálfbæran fisk án veiða eða hefðbundins fiskeldis.