Framleiddu úrvalsmjólk alla mánuði

Höfundur: Sigurður Már Harðarson

Alls uppfylltu 47 kúabú skilyrði Auðhumlu um framleiðslu á úrvalsmjólk alla mánuði síðasta árs.

Allir framleiðendur sem uppfylla skilyrðin úrvalsmjólkur fá greitt tveggja prósenta álag ofan á afurðastöðvaverð í þeim mánuði sem úrvalsmjólk er lögð inn.

Sömu framleiðendur ár eftir ár

Að sögn Jóhannesar Hr. Símonarsonar, framkvæmda- stjóra Auðhumlu, verða þessir 47 framleiðendur heiðraðir sérstaklega á næstu vikum fyrir stöðug- leika í gæðaframleiðslu, líkt og hefð sé fyrir.

Jóhannes segir að framleiðendur úrvalsmjólkur séu oft sömu framleiðendurnir ár eftir ár. Flestir eru framleiðendurnir sem framleiddu úrvalsmjólk alla mánuði síðasta árs í Norðausturdeild, eða 16 talsins.

Hlutfall úrvalsmjólkur hækkar

Á síðasta ári hafi innlögð mjólk í þessum úrvalsmjólkur- gæðum verið um 62,2 milljónir lítra, eða um 40% af allri innlagðri mjólk. Hlutfall úrvalsmjólkur af heildarinnvigtun mjólkur þokast upp á við ár frá ári.

Skilyrðin fyrir verðlaunaveitingu fyrir úrvalsmjólk eru þau að hámark frumutölu í mánuðinum sé 200 þúsund frumur á millilítra eða lægra mælt og reiknað sem faldmeðaltal. Að hámark líftölu í mánuðinum sé 20.000 einingar á millilítra, mælt og reiknað sem beint meðaltal mánaðarins. Að hámark frírra fitusýra sé 0,9 mmol/l reiknað sem faldmeðaltal mánaðar.