Líf og fjör í Laufskálarétt
„Það gekk allt ljómandi vel í blíðskaparveðri,“ segir Atli Már Traustason, réttarstjóri í Laufskálarétt í Hjaltadal í Skagafirði, sem fram fór 26. september síðastliðinn. Um 400 fullorðin hross og „slatti af folöldum“, eins og Atli Már orðaði það, komu til réttar og er fjöldinn svipaður og verið hefur undanfarin ár.
Fjöldi þeirra gesta sem fylgjast með réttarstörfum hefur vaxið „og virðist ekkert lát á, það er t.d. alltaf að aukast að útlendingar komi hér, ýmist til að fylgjast með og upplifa stemninguna eða til að taka þátt í smölum,“ segir hann. Lítið sé þó gert í að auglýsa viðburðinn. „Þetta hefur spurst út, við gerum ekki annað en að auglýsa réttardansleik í Svaðastaðahöll en þangað koma að jafnaði 1.600 til 1.700 manns og er mikið fjör.“
Fjöldinn álíka og á góðri bæjarhátíð
Atli Már segir að um 3.000 manns fylgist að jafnaði með Laufskálarétt og þó ekki sé um stærstu stóðrétt landsins að ræða þegar horft er til fjölda hrossa hefur hún vinninginn þegar að mannfjölda kemur. „Þetta er álíka og á góðri bæjarhátíð,“ segir hann.
Öll gisting í Skagafirði er jafnan uppseld þessa helgi og þátttakendur dreifast víðar um norðanvert landið, dvelja í Húnavatnssýslu eða Eyjafirði. „Þessi helgi er mikilvæg fyrir samfélagið, ferðamannatímabilið er að fjara út á þessum tíma þannig að það er mikil lyftistöng að fá þennan fjölda inn á svæðið, einkum fyrir þá sem selja gistingu og veitingar,“ segir Atli Már.
Töluvert er um að útlendingar sækist eftir að komast með í smalamennsku og leigja þeir sér þá hest til fararinnar. „Fólk er búið að panta með löngum fyrirvara. Vonandi er þetta bara komið til að vera,“ segir hann.
