Full aðild talin styrkja rödd Íslands innan SÞ
Ísland er nú aðili að milliríkjanefnd Sameinuðu þjóðanna um líffjölbreytni og vistkerfisþjónustu.
Ráðherra umhverfis-, orkuog loftslagsmála, Jóhann Páll Jóhannsson, staðfesti nýlega aðild Íslands að IPBES, milliríkjanefnd Sameinuðu þjóðanna, um líffræðilega fjölbreytni og vistkerfisþjónustu (e. Intergovernmental SciencePolicy Platform on Biodiversity and Ecosystem Services).
IPBES er alþjóðlegur vettvangur sem sameinar vísindamenn og stjórnvöld með það að markmiði að stuðla að betri ákvörðunum varðandi líffræðilega fjölbreytni og vistkerfisþjónustu.
Íslenskar áherslur á dagskrá
Segir í tilkynningu ráðuneytisins að Ísland hafi hingað til aðeins verið áheyrnaraðili en með fullri aðild skapist tækifæri til að styrkja framlag Íslands á alþjóðavettvangi og koma íslenskum áherslum betur á dagskrá, m.a. varðandi málefni norðurslóða.
Aðildin er sögð mikilvægt framfaraskref í þágu líffræðilegrar fjölbreytni. Með þátttökunni gefist tækifæri til að efla sess líffræðilegrar fjölbreytni í íslenskri stjórnsýslu í krafti baklandsins sem IPBES gefi. Virk þátttaka Íslands í alþjóðlegum vísindarannsóknum og dýpra alþjóðasamstarf séu lykillinn að því að hámarka árangur Íslands í þessum efnum.
Veitir áreiðanlegar upplýsingar
IPBES var stofnað árið 2012 og starfar á svipaðan hátt og milliríkjanefnd um loftslagsbreytingar; IPCC (e. Intergovernmental Panel on Climate Change). IPBES er, skv. tilkynningunni, einn helsti vettvangur alþjóðlega vísindasamfélagsins til að safna, greina og koma á framfæri grundvallarupplýsingum um stöðu líffræðilegrar fjölbreytni og veita ráðgjöf á því sviði. IPBES vinnur að því að veita stjórnvöldum og öðrum aðilum áreiðanlegar og vísindalega uppbyggðar upplýsingar um ástand náttúruauðlinda og áhrif mannlegra athafna á líffræðilega fjölbreytni og vistkerfi, ásamt ráðleggingum um hvernig bæta megi þessa stöðu. Fókus IPBES er á líffræðilega fjölbreytni og hvernig við getum verndað náttúruauðlindir sem eru mikilvægar fyrir lífsgæði okkar og þróun.
