100 ára afmæli fagnað með hátíðardagskrá

Reykholt í Biskupstungum er einn af byggðakjörnum Bláskógabyggðar en þar búa um 500 manns og fer íbúum stöðugt fjölgandi. Það stendur mikið til miðvikudaginn 20. maí því þá verður haldið upp á 100 ára afmæli þorpsins.

Ásborg Arnþórsdóttir, íbúi í Reykholti og fyrrverandi ferðamálafulltrúi er ein af þeim, sem eru að undirbúa hátíðarhöldin.

„Þetta byrjaði allt með grúski og verkefni, sem gekk út á það að koma upp fræðsluskiltum um sögu þorpsins og minnast frumbyggjanna sem lögðu grunninn að því sem við njótum góðs af í dag, þeirra sem ruddu brautina, hófu garðyrkju og búskap í Reykholti og beisluðu Reykholtshver,” segir Ásborg.

Upphaf byggðar í Reykholti má í raun rekja til þess að vinnumaðurinn Jón Halldórsson gaf Biskupstungnahreppi land og fé til að byggja barnaskóla við Reykholtshver. Í heimildum kemur fram að þessi gjafagjörningur hafi átt sér stað þann 20. maí 1926 og því þótti vel við hæfi að afhjúpa söguskiltin á þessum degi og halda hátíð.

„Þarna var kominn afmælisdagur Reykholts og gaman að rifja upp söguna og miðla. Að baki verkefninu er áhugahópur heimamanna eða sögunördar má segja. Aðalhvatamaðurinn er Sveinn Sæland á Espiflöt sem leiðir verkefnið. Svo koma að þessu með myndarlegum hætti fleiri fulltrúar stóru garðyrkjustöðvanna hér, áhugasamir íbúar, fyrirtæki og sveitarfélagið Bláskógabyggð,” segir Ásborg.

Fjölmenningarsamfélag

Um 500 íbúar búa í Reykholti í dag og er staðurinn sannkallað fjölmenningarsamfélag. „Ég hef ekki tölu á húsunum enda spretta þau upp eins og gorkúlur þessa dagana og heilu göturnar verða til. Ef maður bregður sér til Reykjavíkur er komið nýtt hús þegar komið er til baka,” segir Ásborg hlæjandi.

Dagskráin 20. maí hefst klukkan 16:00 þar sem skiltunum hefur verið komið fyrir, en þar verður klippt á borða. Börn úr Reykholtsskóla syngja fyrir gesti og Bjarni Harðarson flytur tölu. Þá verður söguganga um nágrennið með leiðsögn. Að því loknu verður boðið upp á kaffiveitingar í Aratungu.

Garðyrkja og ferðaþjónusta

Ásborg segir að allt snúist um garðyrkju og ferðaþjónustu í Reykholti. „Já, þetta er öflugasta ylræktarsvæði á landinu. Hér eru mjög stórar garðyrkjustöðvar og enn meiri uppbygging er í farvatninu. Stöðvarnar sérhæfa sig í ákveðnum tegundum og eru þær stærstu á landsvísu hver á sínu sviði. Friðheimar eru stærsta tómataræktunarstöðin, Espiflöt er stærst í ræktun afskorinna blóma, Gufuhlíð er stærst í gúrkuræktun, Jarðaberjaland er stærst í framleiðslu jarðarberja og Kvistabær er stór skógarplöntuframleiðandi,” segir Ásborg og bætir við.

„Ferðaþjónustan er líka mjög mikilvæg Í Bláskógabyggð og þar með talið í Reykholti, hér er fjölbreytt gæðaþjónusta við ferðamenn og heimamenn njóta sannarlega líka góðs af því. Hátt þjónustustig eykur lífsgæði íbúa og skapar fjölbreytt störf. Í Reykholti eru t.d. fjórir veitingastaðir en það eru Restaurant Mika, sem eru sérfræðingar í súkkulaði, Friðheimar með matarupplifun í gróðurhúsi, Vínstofa Friðheima með veitingar og viðburðadagskrá og Reykholt Hub fish & chips. Svo eru fjölbreyttir gistimöguleikar og verslun með allt sem þarf”.