Djúpborunarverkefni fékk hæsta styrkinn
Áfram heldur Loftslags- og orkusjóður að styðja við nýsköpun og tækiþróun í nýtingu jarðvarmans og nýlega var 600 milljónum úthlutað til 11 verkefna á þessu sviði, bæði til almennrar húshitunar og djúpborunarverkefna.
Um framhaldsstuðningsverkefni er að ræða frá síðasta vori þegar átakið Jarðhitinn jafnar leikinn var kynnt, sem felst í stuðningi við leit og nýtingu jarðhita til húshitunar í þeim tilgangi að jafna stöðu þeirra 10% heimila landsins sem ekki geta nýtt sér jarðhita til húshitunar. Heildarstuðningsupphæðin þá var einn milljarður og var þeirri upphæð úthlutað síðasta haust til 18 verkefna.
Jarðhitakerfið stækkað niður á við
Nú er úthlutað einnig til verkefna sem falla undir þróun á tækni til viðhalds á hefðbundnum búnaði, smáskjálftarannsóknir, bætta nýtingu varma og nýtingu varmadælna við jarðhitakerfi. Mörg verkefnanna snúast um djúpborun.
Jóhann Páll Jóhannsson umhverfis-, orku- og loftslagsráð- herra undirritaði samstarfsyfirlýsingu við þrjú íslensk orkufyrirtæki, Landsvirkjun, Orkuveitu Reykjavíkur og HS Orku, á málstofu á ráðstefnunni Hringborði norðurslóðanna í október um að flýta þróun næstu kynslóðar jarðvarmakerfa og djúpborunarverkefna, sem hluta af langtímastefnu Íslands.
Þá sagði ráðherra að samstarfsyfirlýsingin væri vegna verkefnisins Iceland Deep Drilling Project-3 (IDDP-3), sem gengi út á að bora dýpra ofan í jarðhitakerfi á háhitasvæðum en áður hefur verið gert. Þar með væri virkjuð varmaorka í dýpri lögum og jarðhitakerfið stækkað niður á við.
IDDP-3 er þriðja hluti IDDP-verkefnisins og miðast við boranir á Hengilssvæðinu. IDDP-1 var fyrsta verkefnið við Kröflu og IDDP-2 var á Reykjanesi en verkefnið allt hefur verið í þróun síðustu 25 ár.
Sagði ráðherra á málstofunni að Orkuveita Reykjavíkur og samstarfsaðilar verkefnisins myndu hefja boranir strax á þessu ári í Henglinum.
Djúpborun á Nesjavöllum
Stærsti styrkurinn, tæplega 310 milljónir króna, rennur einmitt til verkefnisins IDDP3, djúpborunar á Nesjavöllum sem er samstarfsverkefni Orkuveitu Reykjavíkur, Landsvirkjunar, HS Orku og stjórnvalda. Markmiðið þess er að bora dýpra ofan í jörðina og hagnýta jarðhita við hærra hitastig en áður hefur reynst mögulegt. Í tilkynningu úr ráðuneytinu segir að takist að virkja raforku með þessum hætti yrði unnt að margfalda framleiðslugetu hverrar borholu á komandi árum. Ísland standi framarlega í rannsóknum og þróun á þessu sviði.
Næsthæsta styrkinn hlýtur Orkubú Vestfjarða; 160 milljóna króna stuðning til jarðhitanýtingu á Ísafirði og svo 25 milljónir til borana á Gálmaströnd yst í Steingrímsfirði. Seinna verkefnið snýst um að skapa forsendur til aukinnar atvinnuuppbyggingar og verðmætasköpunar í Strandabyggð.
