Hart barist um gullið fyrir austan
Austurlandsmótið í sveitakeppni fór fram á dögunum á Eiðum og fór sérlega fram. Austurlandsmeistarar 2026 eru sveit Fiskmarkaðar Djúpavogs en gestasveitin SFG varð efst í mótinu.
Í næstsíðustu umferð tókust á efstu sveitirnar tvær í innbyrðis viðureign og ekkert gefið eftir. Guttormur Kristmannsson og Sigurjón Stefánsson skrifuðu feita tölu í eigin dálk gegn SFG í spili dagsins sem er úr bardaganum.
Eftir opnun á spaða og hjartainnákomu á öðru sagnstiginu hólkaði Guttormur sér í 4 spaða án umhugsunar. Liðsmaður SFG doblaði með ágætan fimmlit í trompi, nokkuð vongóður. Út kom lauf, Sigurjón sagnhafi tók á laufás, spilaði hjartás, trompaði hjarta og spilaði tígli. Norður drap, spilaði trompi og þótt legan væri ekki frýnileg var ekki annað eftir en að trompa 3ja hjartað og þegar það gekk rekur spilið sig upp í 10 slagi, þar af tók Sigurjón 7 trompslagi. Engin veizla hjá Norðri. Glæsileg tala eða 790 í dálk Austurlandsmeistaranna í Fiskmarkaði Djúpavogs.
Aðeins eitt annað par skifaði þá tölu í eigin dálk í þessu spili, en það var á hinu borðinu í leiknum! Fiskmarkaðurinn vann leikinn gegn SFG en alslemma í síðasta spili mótsins í lokaumferð skilaði SFG sigrinum á mótinu.
Umsjónarmaður þakkar Austfirðingum og ekki síst Eyþóri Stefánssyni frábærar móttökur og hvetur til góðrar þátttöku næsta ár. Alls komu þrjár gestasveitir að sunnan nú en heimamannaliðin dreifðust allt frá Vopnafirði og suður að Hornafirði.
Umsjón: Björn Þorláksson.
bjornthorlaksson[hjá]gmail.com
Austurlandsmótið var mjög vel sótt og frábærlega að því staðið með hagstæðum tilboðum fyrir gestasveitir og fyrirtaks veitingum og gistingu á Eiðum. Mynd: BÞ
