Heimsmarkaðsverð í hættu
Verð á Arabica kaffi hækkaði um tíu prósent nýverið, til viðbótar tuttugu prósenta hækkun um miðjan júlí. Hefur hækkunin ekki verið meiri í tæp sjö ár en óvanalegur veðurkuldi hefur ógnað kaffirækt stærsta framleiðanda heims í Brasilíu.
Vetrarmánuðir Brasilíu spanna frá júníbyrjun til ágústloka og vanalega fer hitastigið neðar
en 13 °C.
Mikil frost hafa hins vegar plagað Brasilíubúa og skemmt með því stóran hluta kaffiekranna auk þess sem búist er við heilmiklu kuldakasti á næstu dögum. Kaffirunnar eru afar viðkvæmir fyrir frosti sem getur valdið miklum skaða og jafnvel drepið þá að fullu. Kaffiræktendur standa þá mögulega frammi fyrir því að hefja ræktun að nýju með von um betri tíð. Ferlið tekur þó um þrjú ár – frá gróðursetningu að því að hægt sé að vinna kaffi úr berjum runnans.
Bráðabirgðatölur frá matvælastofnun brasilískra stjórnvalda töldu að nú þegar hefði veðurfarið haft áhrif á eitt hundrað og fimmtíu þúsund til tvö hundruð þúsund hektara – um 11% af heildaruppskeru arabica kaffis í landinu.
„Umfang tjónsins er enn óljóst, en áætlað tap er nú á bilinu 5,5 til 9 milljónir (ef um ræðir 60 kg kaffibaunasekki), miðað við hækkun frá 2 milljónum í 3 milljónir í vikunni þar á undan,“ sagði Charles Sargeant, hjá Britannia Global Markets.
Sargeant var að vísa til uppskeru Brasilíu árið 2022. Framleiðsla þessa árs sem þegar hefur verið tekin upp er minni en sú sem er áætluð á næsta ári. Mikilvægt er að áætluð góð framleiðsla næsta árs standist – vegna jafnvægis á heimsvísu.
Útlit er fyrir þó nokkurri hækkun á heimsmarkaðsverði og þá í kjölfarið líkur á hækkun hjá helstu vörumerkjum sem hafa margir hverjir gert viðeigandi ráðstafanir.
