Bændafundir

Höfundur: Gunnar Þorgeirsson, formaður Bændasamtaka Íslands

Í þessari viku er stjórn Bændasamtakanna, ásamt starfsfólki, í hringferð um landið til samtals við bændur.

Á heimasíðu samtakanna bondi.is, á samfélagsmiðlum og í útvarpi, hvar auglýsingar um fundina óma, er hægt að kynna sér hvar á landinu við verðum. Þema fundaraðarinnar að þessu sinni er Samtal um öryggi, þar sem meginstefið verður umfjöllun og umræður um fæðuöryggi, öryggi bænda og afkomuöryggi. Það er mikil tilhlökkun hjá stjórn og starfsfólki Bændasamtakanna að hitta bændur og taka samtalið um helstu málefnin sem snúa að landbúnaði og starfsskilyrðum bænda. Þegar þetta er ritað, höfum við þegar lokið góðum og gagnlegum fundum í Borgarnesi, Ísafirði og Húnaþingi vestra og á leið til fundar við Skagfirðinga. Það er von mín að þessir fundir verði okkur öllum til gagns þar sem við getum átt málefnalegt samtal um áskoranir í landbúnaði og þau mál sem við eigum að leggja áherslu á á komandi vikum og mánuðum í starfi samtakanna með hag bænda í fyrirrúmi.

Fram undan í starfi Bændasamtakanna

Að loknum sumarleyfum hófu þrír nýir starfsmenn störf hjá samtökunum en þau eru Sverrir Falur Björnsson hagfræðingur og Stella Björk Helgadóttir markaðsfræðingur. Þá hefur Gunnar Gunnarsson hagfræðingur verið ráðinn til að sinna sérverkefnum fyrir samtökin. Þau bætast við öflugan hóp starfsmanna Bændasamtakanna og vil ég bjóða þau hjartanlega velkomin til starfa. Með ráðningu þessara starfsmanna erum við að leggja grunn að endurskoðun búvörusamninga sem er á grunni núgildandi samninga með endurskoðunarákvæði á árinu 2023. Mikilvægt er fyrir okkur að huga vel að undirbúningnum fyrir komandi endurskoðun og jafnframt leggja grunn að nýjum samningi 2026. Slíkur undirbúningur er afar mikilvægur í hagsmunabaráttunni til að við náum samfellu í áherslum bænda við framtíðarstefnu um fæðuöryggi, á sama tíma og atvinnugreininni er ætlað að draga úr kolefnisspori framleiðslunnar.

Í næstu viku flytja Bændasamtökin og Bændablaðið í nýtt skrifstofuhúsnæði á 4. hæð í Borgartúni 25. Mikil vinna hefur farið fram í að verða heilt ár að undirbúa flutning samtakanna úr húsnæðinu að Hagatorgi 1, Bændahöllinni, þar sem skrifstofa samtakanna hefur verið til húsa í að verða 60 ár. Þetta hefur tekið ansi mikinn tíma af starfsfólki samtakanna enda sagan löng og yfirfullar geymslur af alls kyns dóti sem endurspegla þá löngu íveru sem samtökin hafa haft í húsnæðinu. Mikið af þessu dóti hefur fengið annað líf eða verið fundinn nýr samastaður fyrir sagnfræðinga framtíðarinnar.

Dagur landbúnaðarins og Landbúnaðarsýningin

Í fyrsta skiptið verður haldinn dagur landbúnaðarins, en hann mun fara fram þann 14. október nk. á Hótel Nordica. Framtíðin verður í fyrirrúmi á þessari fyrstu ráðstefnu samtakanna þar sem sjónum verður beint að fæðuöryggi, umhverfis- og loftslagsmálum og hringrásarhagkerfinu. Er það von mín að ráðstefnan verði að árlegum viðburði hér eftir, enda snerta málefni landbúnaðarins okkur öll.

Eftir hádegi sama dag verður svo stórsýningin Íslenskur landbúnaður haldin í Laugardalshöll, en sýningin mun standa yfir dagana 14.-16. október en Bændasamtökin munu bjóða félagsmönnum sínum til sýningarinnar.
Gert er ráð fyrir yfir 100 sýnendum sem munu kynna alla þætti íslenskrar landbúnaðarframleiðslu og nýja búnaðartækni þannig að báðir aðilar, bæði framleiðendur og neytendur, hafi hag af. Síðasta sýning árið 2018 sló öll aðsóknarmet og er áhuginn fyrir sýningunni í haust síst minni.