Reykjaböðin verða opnuð í vor

Nú styttist óðum í að Reykjaböðin opni, en um ræðir nýtt náttúrulón og heilsulind við rætur Reykjadals í Hveragerði.

Þar verður boðið upp á fjölbreytt upplifunarsvæði þar sem hver og einn finnur sitt athvarf frá öllum æsingnum. Þrjú félög fjárfesta eiga böðin en það eru fyrirtækin Hveraberg, Dionysus og Kynnisferðir. Undirbúningur hefur staðið yfir í nokkur ár en framkvæmdir við byggingu baðanna hófust haustið 2024. Jóhanna Hreiðarsdóttir er framkvæmdastjóri baðanna en hún er mjög spennt fyrir opnuninni í vor.

„Já, hvort ég er. Hér munu gestir okkar geta notið augnabliksins, endurnærst í heitum lindum og fundið orkuna sem býr í íslenskri náttúru, hvort sem það er á björtum sumarkvöldum eða undir dansandi norðurljósum. Okkar markmið er að skapa eftirminnilega upplifun í einstöku umhverfi þar sem stórbrotin náttúrufegurð, kraumandi jarðhiti, íslensk menning og vellíðan renna saman,“ segir Jóhanna.

Sérstakt upplifunarsvæði

Í böðunum verður sérstakt upplifunarsvæði, en hvað þýðir það? „Já, við ætlum að leggja áherslu á að skapa heildræna vellíðunarupplifun þar sem áhrif íslenskrar náttúru og menning landsins leika lykilhlutverk.

Markmiðið er að skapa athvarf og rými, sem faðmar gesti með hlýju og mýkt. Hvert rými er hannað til að vekja skynfærin og leiða þig inn í ferðalag slökunar og endurnýjunar. Við nýtum innblástur frá japönskum onsen-heilsulindum, sérstaklega aðdáun okkar á einfaldleika og hreinleika sem þar ríkir og tvinnum saman við íslenska baðmenningu og norrænar baðhefðir,“ segir Jóhanna.

Steinefnaríkt jarðhitavatn

Í Reykjaböðunum verða heitu lindirnar um 900 fm að stærð, með steinefnaríku jarðhitavatni þar sem gestir geta valið sér sinn stað, hvort sem það er að tengjast náttúrunni undir berum himni eða njóta með drykk í hönd við arineld í skjóli fyrir veðri og vindum. Á útisvæði verður viðburðasána með sjálfvirkum búnaði til að halda jöfnu hitastigi, tveir kaldir pottar fyrir byrjendur og lengra komna ásamt „Kneipp“ vaðlaug með sjávarsteinum sem örva blóðrásina.

„Við verðum með frábært og einstakt baðhús en húsið hvetur fólk til að ganga í gegnum margs konar vellíðunarathafnir við mismunandi hitastig, áferð og ilm. Í boði verður snjóherbergi, gufubað, jurtapottur, upplifunarsturtur, sána, kaldur pottur, flotlaug og slökunarpottur með arineld. Upplifunin er því ólík eftir því hvort gestir kæla sig niður í ískalda snjóherberginu eða sitja í jurtapottinum og anda að sér ilminum af íslenskum jurtum úr umhverfinu,“ segir Jóhanna og bætir við að þeir, sem vilja láta dekra við sig geti bætt við völdum meðferðum á borð við slakandi nuddi, endurnærandi andlits- og líkamsmeðferðum eða flotmeðferðum í vatni.

Lónsbar og útisvið

Lónsbar verður bar á staðnum þar sem gestir geta fengið svalandi drykki meðan þeir baða sig. Við hlið barsins verður útisvið með hljóðkerfi og skjávarpa. Reglulega verður boðið upp á fjölbreytta viðburði, þar á meðal flot, gusur, lifandi tónlist og fleira. Í upphafi eða lok heimsóknar er tilvalið að njóta ljúffengra veitinga á veitingastaðnum þar sem boðið verður upp á létta rétti ásamt úrvali heitra og kaldra drykkja.

Opnað í maí

En hvenær er stefnt að því að opna böðin? „Stefnt er að því að opna Reykjaböðin í maí 2026. Framkvæmdir eru í fullum gangi og miðar vel áfram. Við hlökkum mikið til að taka á móti fyrstu gestum og vonum svo sannarlega að heitu lindirnar og baðhúsið muni slá í gegn, bæði hjá Íslendingum og erlendum ferðamönnum. Við gerum ráð fyrir að þurfa að ráða í 25 til 35 stöðugildi fyrsta árið,“ segir Jóhanna að lokum.