Hljóðbylgjur slökkva elda
Hljóðbylgjur gætu mögulega orðið lykiltæki í baráttu við skógarelda.
Samkvæmt Scientific American hefur bandaríska fyrirtækið Sonic Fire Tech þróað kerfi sem notar infrasound (hljóð sem er lægra en tíðni mannlegrar heyrnar nemur) til að slökkva litla elda áður en þeir breiðast út.
Grunnurinn að tækninni er að fjarlægja eitt af þremur lykilskilyrðum elds, það er að segja súrefni. „Það er í raun að láta súrefnið titra hraðar en eldsneytið getur nýtt það, þannig að þú stöðvar efnahvarfið,“ segir Geoff Bruder, flugverkfræðingur og stofnandi Sonic Fire Tech. Fyrirtækið hefur sýnt fram á að kerfið virkar í allt að 7,5 metra fjarlægð.
Hugmyndin er ekki ný. Varnarmálastofnun Bandaríkjanna rannsakaði aðferðina á árunum 2008–2011, og vísindamenn hafa þróað svipaðar lausnir, meðal annars slökkvitæki sem líktist subwoofer (magnari fyrir lágtíðnihljóð) árið 2015. „Áhrif hljóðs á eld eru vel þekkt í bruna,“ segir Albert Simeoni, prófessor við Worcester Polytechnicstofnunina. „Áskorunin er að skala tæknina upp án þess að skapa truflandi eða skaðleg hljóðáhrif.“
Sonic hefur þegar hannað kerfi gegn húsbrunum og notar infrasound, bylgjur undir 20 hertz sem eru utan tíðnisviðs mannlegrar heyrnar og ferðast lengra en hærri tíðnir. Kerfið nýtir stimpla sem knúnir eru af rafmótor og senda bylgjur í gegnum málmrör á þaki og undir þakskeggjum húsa. Skynjarar virkja kerfið sjálfkrafa þegar logi greinist og mynda „kraftsvið“ sem hindrar nýja kveikju.
Tæknin virkar enn sem komið er aðeins á litla loga, að sögn Arnaud Trouvé hjá háskólanum í Maryland, en áhuginn á að þróa tæknina frekar er mikill. Sonic vinnur nú með tveimur orkufyrirtækjum í Kaliforníu og hyggst setja upp 50 tilraunakerfi snemma árs 2026. Nokkrir húseigendur hafa þegar skrifað undir samninga um kerfið.
