Geymdu korn í jarðgöngum
Bændur í Suður-Þingeyjarsýslu brugðu á það ráð að keyra vagna með nýþresktu byggi í skjól í jarðgöngum á Húsavík.
„Kornakrarnir sem eftir voru, einhverjir tugir hektarar, voru orðnir gulir og þroskaðir og við höfðum áhyggjur af því að þeir færu mjög illa í veðrinu sem var spáð í síðustu viku,“ segir Haukur Marteinsson, bóndi á Kvíabóli í samtali. Bændur í Suður-Þingeyjarsýslu hafa komið upp öflugum félagsskap í kringum ræktun og þurrkun á korni. „Við vorum farnir að hringja í bændur á svæðinu til þess að kanna hvort við gætum hýst vagna með korni í skemmum hjá þeim. Svo fékk Arnór Orri Hermannsson á Björgum þá hugmynd, þegar hann horfði á gangnamunann við höfnina á Húsavík, að við gætum mögulega potað vögnunum í göngin þar sem PCC á Bakka er búið að loka og göngin standa auð.
Við áttum nokkur símtöl og fengum að henda vögnunum þarna inn, en það hentaði vel þar sem göngin eru nálægt þurrstöðinni okkar á Húsavík. Við grínuðumst með það að þetta væri dýrasta korngeymslan á Íslandi. Eitthvað af korninu var þarna í mjög stuttan tíma, en það síðasta fór í þurrkun núna á mánudaginn. Kornið var orðið það vel þroskað og þurrt að það var ekki farið að hitna mikið á þessum tíma.
Á síðustu tveimur sólarhringunum áður en veðrið skall á þresktum við á bilinu 40 og 50 hektara og fór kornið á samtals 13 vagna og einn tengivagn á vörubíl. Það var gott veður á þriðjudeginum og við kláruðum síðasta akurinn klukkan fjögur um nóttina áður en appelsínugula viðvörunin skall á á miðvikudeginum. Þetta slapp af því að við fengum lánaða vagna hjá verktaka á Húsavík og tengivagn sem tekur 24 rúmmetra sem hjálpaði okkur mjög mikið. Eins keyrðum við um sveitir og fengum lánaða vagna með háum skjólborðum.
Þetta gekk mjög vel, en við erum með nýja þreskivél sem við keyptum í sumar. Við byrjuðum að þreskja 8. september og hefur hver einasta þurra stund síðan verið nýtt til þess. Heilt yfir var uppskeran góð og gæði kornsins líka, þó svo að þetta hafi ekki verið jafn stórkostlegt ár og í fyrra þar sem allt korn var frábært. Við vorum með mjög góða akra, en inn á milli voru akrar sem voru lélegri. Meðaluppskeran af öllu svæðinu hefur líklega verið í kringum fjögur tonn á hektarann og var rúmþyngdin víða sex til sjö hundruð kíló í rúmmetra.
Nýja kornþurrkstöðin á Húsavík hefur gengið vel, en afköstin hafa verið nokkuð hæg þar sem akrarnir voru grænir og með mikilli títu fram í október, en kornið var samt sem áður gott. Fyrsta frostið kom fyrir tveimur vikum, en það hefði mátt koma fyrr svo að akrnarnir hefðu verið búnir að herða sig meira og gulna. Við höfðum áhyggjur þegar við fengum fyrsta kornið inn að það væri ekki af nógu miklum gæðum. Fyllingin var hins vegar komin og þegar kornið fer í gegnum þurrkarann nær það 88 prósent þurrefni,“ segir Haukur Marteinsson.
