Bandarískur vínberjastofn vekur mikla ólgu yfirvalda

Franska ríkisstjórnin hefur í tæp 90 ár unnið að útrýmingu a.m.k. sex bandarískra vínviðartegunda úr frönskum jarðvegi. Haldið er fram slæmum áhrifum á bæði líkamlega og andlega heilsu manna, auk þess að úr þeim sé einungis hægt að framleiða ódrekkandi vín.

Vínviður þessi sem er blendingur („afkvæmi“ tveggja mismunandi vínberjategunda) er þó harðgerðari en ella og hefur staðið af sér bæði sjúkdóma og kuldaköst sem herjað hafa á vínberjaakra Frakklands síðastliðin ár.

Í Suður-Frakklandi má til dæmis finna slíkan akur sem látinn hefur verið í friði og blómstrað af afli í gegnum tíðina, þó blendingstegundin sem slík hafi verið bönnuð af frönskum yfirvöldum síðan 1934. Og það sem meira er, hann er ræktarlegur og fínn þó ekki hafi hann verið úðaður eiturefnum sem franskir vínbændur eru gjarnir á að nota á akra sína. Áhugavert er að vínekrur Frakka þekja yfir 4% af landsvæði landsins og nota 15% eiturefna sér til varnar.

Til er hópur sem kallar sig Forgotten Fruits og berst fyrir lögleiðingu bandarísku þrúgnanna. Þeir benda réttilega á að þessir óvinsælu vínviðir tryggja ríkulega uppskeru, án áburðar eða sérstakrar meðferðar, og því tilvaldir til vinnslu lífrænna víntegunda. Hefur barátta Forgotten Fruits vakið mikla athygli og standa nú yfir viðræður við frönsk stjórnvöld með það fyrir augum að lögleiða blendingsvínviðinn svo hægt sé að tryggja góða afkomu og miða að lífrænni og bragðgóðri framleiðslu.