Ytri-Hofdalir

Halldór og Halldóra Lilja keyptu jörðina Ytri-Hofdali árið 1986 og fluttu  úr Svarfaðardalnum ásamt kettinum Pollý og tveimur sonum, Þórarni og Bjarka, og hófu blandaðan búskap. Ári seinna bættist Þórdís við. Þau hafa unað sér vel þar síðan.

 

Býli: Ytri-Hofdalir.

 

Staðsett í sveit: Í miðjum Skagafirði.

 

Ábúendur: Á neðri bænum búa Halldór Jónasson, Halldóra Lilja Þórarinsdóttir og Þórarinn Már Halldórsson. Á efri bænum búa Þórdís Halldórsdóttir, Herbert Hjálmarsson og Hjálmar Herbertsson.

 

Fjölskyldustærð (og gæludýra): Þetta telur allt frá ellilífeyrisþega niður í ungbarn og allt þar á milli. Tveir vel virkir Border Collie hundar, þeir Tappi og Krummi, og tveir fjósakettir; Branda og Panda.

 

Stærð jarðar?  187 ha, þar af tæp­lega 50 ha ræktaðir.

 

Gerð bús? Blandað bú.

 

Fjöldi búfjár og tegundir? 31 mjólkurkýr í gömlu fjósi með brautarkerfi, 200 kindur í garða­húsum. 50 geldneyti og slatti af hrossum.

 

Hvernig gengur hefðbundinn vinnudagur fyrir sig á bænum? Byrjar og endar með mjöltum á kúm, gjöfum hjá geldneytum og á veturna þegar búið er að taka inn, þá hjá sauðfé líka. Svo á milli eru tækluð þau viðfangsefni sem falla til, sem eru alltaf einhver, mismunandi bara eftir árstíðum.

 

Skemmtilegustu/leiðinlegustu bústörfin? Skemmtilegast er sauðburður, göngur og þegar fæðist kvíga sem ekki er rauð á litinn (og lifandi) og fallega flekkótt lamb.

Leiðinlegast er að velja úr á sláturhús gimbrar og girðingarvinna.

 

Hvernig sjáið þið búskapinn fyrir ykkur á jörðinni eftir fimm ár? Með svipuðu sniði bara tæknivæddari mögulega.

 

Hvaða skoðun hafið þið á félags­málum bænda? Mætti vera kannski fjölbreyttari en annars er þetta á góðri leið.

 

Hvernig mun íslenskum landbúnaði vegna í framtíðinni? Við segjum bara eins og Sigurgeir Sindri myndi segja: „Framtíðin er björt“.

 

Hvar teljið þið að helstu tæki­­færin séu í útflutningi íslenskra búvara? Með vaxandi upplýsinga­flæði til neytenda ættum við að einbeita okkur að því að halda okkar vörnum og halda okkar framleiðslum öllum hreinum. Hér er lítil lyfjanotkun og það er stórt tromp til framtíðarinnar litið til útflutnings. Ferskt innflutt kjöt inn á markaðinn er grafalvarlegt mál. 

 

Hvað er alltaf til í ísskápnum? Örnu mjólkurvörur, (elsti bóndinn á bænum er með mjólkuróþol) Lýsi, egg og rabarbarasulta.

 

Hver er vinsælasti maturinn á heimilinu? Mikið steikt og vel krydduð lambaslög og kjöt og karrí.

 

Eftirminnilegasta atvikið við bústörfin? Þegar við fórum vestur á Snæfellsnesið í Mávahlíð fyrir mörgum árum að kaupa gimbrar og hrúta, það snarbreytti sauðfjárræktinni okkar. Og þegar að farið var úr þurrheysverkun í rúllurnar.