Vinnustofa í hestaheilsu
Einn fremsti sérfræðingur Evrópu á sviði lífhreyfifræði, stoðkerfisfræða og endurhæfingar hesta heldur námskeið á þessu sviði á Íslandi í vor.
Eiðfaxi auglýsti á dögunum námskeið í hestabæklun og lífhreyfifræði sem haldið verður hjá Eldhestum í Ölfusi í maíbyrjun. Dr. Jenny Hagen, dýralæknir, vísindamaður og löggiltur járningamaður, með sérhæfingu í bæklun, endurhæfingu og þjálfun hesta, kennir á námskeiðinu. Hún er einn fremsti sérfræðingur Evrópu á sviði lífhreyfifræði, stoðkerfisfræða og endurhæfingar hesta.
„Tveggja daga vinnustofan beinist að alhliða og hagnýtu mati á hrossum til að koma í veg fyrir bæklunarmeiðsli eða greina þau eins fljótt og auðið er. Auk þess eru stjórnun bæklunarsjúklingsins, endurhæfing og þjálfun viðfangsefni málstofunnar í fræðilegri nálgun og framkvæmd,“ segir Hagen í samtali við Bændablaðið.
Hún starfaði áður sem dósent við Háskólann í Leipzig þar sem hún stofnaði rannsóknarhóp um lífhreyfifræði og bæklun hesta. Hún hefur leitt fjölda rannsókna á áhrifum járningar, hófsnyrtingar og þjálfunar á gangtegundir og lífhreyfifræði útlima og býr yfir meira en 20 ára reynslu af klínísku starfi, rannsóknum og kennslu víðs vegar um heiminn.
„Ég held að það sé nauðsynlegt að knapar, þjálfarar, dýralæknar og járningamenn séu menntaðir til að meta truflanir í hreyfikerfinu áður en þær verða klínískt mikilvægar,“ segir Hagen og bætir við að þetta sé spurning um að viðhalda frammistöðu og dýravelferð. „Sérstaklega í hestum sem eru notaðir til reiðmennsku eða jafnvel keppni.“ Hún segir að þetta eigi jafnt við um íslenska hesta sem önnur hestakyn.
Námskeiðið er opið öllum áhugasömum, en hentar sérstaklega vel fyrir dýralækna, járningamenn, reiðkennara, þjálfara, tamningamenn, hestameðferðaraðila og ekki síður metnaðarfulla hestaeigendur sem vilja dýpka skilning sinn á hreyfingum, heilbrigði og samspili hófa og líkama hestsins, segir í kynningu.
